Shillong, Feb 24: East Jaintia Hills a·jaoni a·bachenge, uni ja·man west, south west aro uni ja·mano Garo Hills a·jachinaba sokange a·dokoni cho·gimin koelarangna dakkianiko ru·utgijan Meghalaya sorkari a·bachenggnok.
Koelana dakkianirangko a·bachengna tik ka·e ra·ahani gimin National Green Tribunals-ni agan-ku·pattigimino pangchake da·o a·dokni je biaprangon koelarangko dane dona dongachim uarango mangmang chimongani biaprangko tarie donmanaha.
“A·dok sorkarini gita chinga, koelani dam komiengani gimin dam tik ka·e bariatchina gita NGT-na lekka seataha, uni gimin chinga da·o NGT-ni tik ka·e on·ataniko sengenga ine talatan baksa, NGT-ni agan-ge·etanirangko ja·riken chinga gimikkon tarisamsoe donaha….da·ode damni giminsan ong·aijok aro jensomoio ia mamla matchotahaon chinga koelana dakkianiko a·bachengataignok,” ineba dakchakgipa skotong minister agandapataha.
BJP-ni kaman ka·dingsteke ronasa namaia ine Tynsong agana
BJP-dolni kamrangko a·doko ka·dingsteke ronasa namaiengaha ine dakchakgipa skotong minister Pa Prestone Tynsong Mongolbar salo aganaha.
“Samsachi uamang MDA sorkariko namen cha·bokgipasa ine matnangenga aro paksamsachi ka·sapae uamang baksa turimpabo ine aganskaenga. Indide, ia manderang ka·dingsteke roako man·na krajama? Ian kakket chanchianima?” ine Pa Tynsong kobor ra·timgiparangna parakaha.
A·dokni BJP dolni dakchakgipa padot Pa D Chakraborty-ni mamlako agangrike namatna nangnikgen ine agananggipana aganchakengon, chinga uamang baksa agangrikmanaha, mingantikon coordination committee-o agan-chanchirimaha, da·o maini gimin chanchiangkugen ine aganenba, a·dokni BJP dolni matnangarang kakketani dongja maina ia gimikkon Meghalaya-ni manderang ma·sigiparang ong·e namen u·ia ineba Pa Tynsong aganangkuaha.
Dakkianiko a·bachengatachi manderangna dakchakani ong·piltaignok ine Pa Kyrmen agana
A·dokoni cho·gimin koelarangna dakkianiko ru·utgijan a·bachenggnok ine parakatani gimin, ian East Jaintia Hills a·jani manderangna janggi tangani cholko on·anio namen dakchakbeani ong·taignok ine Khliehriat constituency-ni MLA aro cabinet minister Pa Kyrmen Shylla, Mongolbaro aganangaha.
“NGT-ni batanggimin 2014 bilsio a·doko koela cho·aniko champengatani ja·man manderangni neng·nikanirangko janapjole aganenba, a·jani manderang da·o uamangna namgipa salrang sokbaenganiko nikanggnok, maina Meghalaya gimikoniko niatode Jaintia Hills a·jao a·ningni gam ba koela namen bang·a aro a·jani 99 percent mangni gitan koelao pangchake janggi tanggiparangsa ong·toka, uni gimin jensomoio Coal India Limited dakkianiko a·bachengjokon a·jani manderangni janggi tanganio namen dakchakani ong·piltaignok ine ka·dongsoenga,” ineba Pa Shylla aganaha.
East Jaintia Hills a·jao niam gri koelarangko cho·ani kamrang ong·enganiko matnangani gimin sing·on, “koelasan ong·aija, minggipin ong·gija kamrangde dongaia, indiba a·jani police officerrangan district-o mai ong·enga uarang gimikon nirok-simsakatenga. Chingni u·irikgijao janggilchi ong·gija kamrangde dongaia… police dongaiana ong·gija kamrang dongja ia ong·ja, dongaia……ine minister aganchakaha.
Agitchagipa gong kror 949.05 tangkarangko Assembly-o ra·chakanggen
Mikkang ja March 5 tariko a·dokni assembly-o tangka-paisarangko a·dokna chamani bidingo tom·bimonganiko ong·atangnasigipao korosna jakkalanggipa tangka gong kror 2,400 oni gong kror 949.05 agitchagipa tangkarangko a·dok sorkari mikkangchina nangani kri chamsualatgen.
Assembly’s Public Accounts Committee (PAC)ni nipilaniko dakna Mongolbar salo tom·aniko ong·atango finance department-oni iako u·iataha.
Koros ong·gipa gong kror 1.972 oni gong kror 2,400 na baten korosrang agitchaenganio uarangko nipilangna gita committee, finance department-ko okamaha ine PAC-ni member aro Mawsynram-ni MLA Pa Himalaya Shangpliang koborna agan-talataha.
“Ru·utgijan ong·nasienggipa budget-na tom·bimonganio finance department ua tangka gong kror 949.05 -ko ra·chakanggen ine u·iataha. House-o ra·chakataniko dakna gita uamang ia Bill-ko assembly-ona ra·banasienga ine aganan baksa, da·o jako donggipa tangka gong kror 1,500-koba ra·chakatna Assembly-o tom·bimonganio ra·banasienga ineba Shangpliang agandapataha.
