Shillong, Feb 3: A·doko niam gri koela cho·ani kamrangko jakgitele sandirokatna a·dok sorkarini changni-chang jechakani gimin suk ong·jae, warachakgipa dolni dilgipa Dr. Mukul Sangma ia mamlao a·songni Prime Minister-ni jakdangdikataniko am·gen ine aganaha.
Shillong-o Congress Legislature Party-ni tom·aniko dakdilangani ja·man koborni manderangna agan-talatanio, a·dok sorkari ia mamlako jakgitele sandirokatja ong·ode, iana chu·gimik bil gnang jakgitele sandirokataniko dakchina anga a·songni Prime Minister-o mol·molanggen aro anga ka·donga ua (PM) iako jechakjawa,” ine ua aganaha.
Niam pe·anirang Meghalaya-ni simarangni wilwilaosan ong·aija ine aganenba, sima-ari jolrangoba dingtang dingtang niamrangko pe·anirang ong·enga aro iana India sorkarnini dingtangmancha jak snilataniko nangenga ine Pa Sangma aganaha.
Mamlarangni bidingo Bangladesh-ni ge·sa Bengali Daily koboro parakatgiminko toe aganenba, dingtang dingtang a·ningni gamrang, rong·chunrang aro koelarangko a·songgipinchina srik-srik niam gri watatengani kamrang sima-ari jolrango ong·engani a·selan Bangladesh a·songna bang·en gimaani ong·aha ine janapani gnang ine ua parakataha.
Meghalaya a·doko da·o MDA-chi sorkariko rikenggipa iandakgipa ong·gija cha·bokani kamrangko batesa ra·dona jotton ka·enga ine matnangtaiengon, cha·bokani kosako Meghalaya pangnan dakgrikbaenga, indiba da·oni sorkari batesa niam gri koela cho·giparangko didia gita dakskaienga jean namen chanchina nanggipaba ong·a ine aganenba, ia mamlao jakgitele sandirokataniko dakatode pilak ong·gija kamrangko parak ong·atna sakkirangko chu·ongen man·aigen maina Congress, da·omangba iako jako ra·enggipa bil gnanggiparangni mikkango ua sakkirangko mesokna tarie dongenga ine ua agandapaha.
A·doko koela cho·aniko NGT-chi champengatani bidingo a·dok sorkariko matnange, koela cho·atanirangko NGT-chi champengatgimin niamko ra·galgen ine uamang a·dokni manderangko namkalen tol·e cha·bokaha, maina iani chu·sokaniko da·alona kingkingba nikna man·kuja ine Pa Sangma aganaha.
Iarangna agreba, Lokayukta-na gipin memborrangko seokna mande sandiatgipa dol ba committee-ko da·onan songkujaienganichi Lokayukta-ni pilak kamrangko bilgriatna jotton ka·enga ine a·dok sorkariko uni matnangdapanio, Lokayukta-ko da·omangba chairman mangmangchisan chalaienga, jenan nangenggipa sakgni memborrangkode da·oba seokkuja, maina da·o sorkariko rikenggipa iano darangni ku·sik jokanirangkon nangnikgijagipa ong·a, ine warachakgipa dolni dilgipa parakataha.
