Guwahati, August 18: Sombar salo North East Students’ Organisation (NESO) Guwahati-ni Dighaliupukhuri-o tom·dake, niam gri songdongenggipa Bangladeshi-rangko Salgro-Salaram a·dokrangoniko a·rikatchina aro Citizenship (Amendment) Act (CAA)-ko watchangchina dabiangaha.
“Ian Salgro-Salaram gimikoniko pilak niam gri songdonggipa Bangladeshirangko sandie uamangko a·rikatchina dabiani ong·a. Uamangni songdonganiara a·brini jatrangni ong·baanina, ku·sikna, dakbewalna aro janggi tanganina kengni ong·a. Chinga Tripura-ni obostako nikaha aro apsandaken Assam-oba Assam Accord-ko ra·gatgijani a·sel obostarangko chagrongaha,” ine NESO-ni Chief Advisor Samujjal Kumar Bhattacharya talate on·angaha.
Niam gri songdonggiparang a·brini jatrangni songrangko, burungrangko aro gipin a·kanggimin biaprangko ra·seke Assam-ni manderangni songdong-a·chaanirangko dingtangataha inenba, adita salrangna skang a·songni sima ari-o manderangni songdong-a·chaani bewalrang dingtangbaanirangni gimin Prime Minister-ni janapaniara, ru·uta bilsirangna dongenggipa neng·nikanirangko ja·manchake ma·siani ong·e ineba Bhattacharya aganaha.
Uandake, Assam Accord-ko chu·gimik ra·gatna somoiko done kamrangko chu·sokatchina, Indo-Bangladesh sima ari-ko chipchina, Salgro-Salaram gimiko National Register of Citizens-ko (NRC) sejotna, aro a·brini jatrangna niamni gita chel·chakaniko on·china NESO dabiangaha. Una agreba, Salgro-Salaram jolo toromni bidingo draanirang aro niam gri songdonggiparangni kosako dingtangmancha sandianirangko dakchinaba uamang dabiangaha.
CAA-ni bidingo aganengon, Salgro-Salaramni gipin a·dokrangna baten Assam a·doko bang·a neng·nikanirangko man·bataha ine Bhattacharya janapaha. “Mizoram, Nagaland, Manipur, Arunachal aro Meghalaya aro Tripura-ni bang·a biaprango CAA-ko ra·gatna man·jaode, Assam-koba watchangna nanga. A·ja dam 35 dongaoni, dam 27-de CAA-ni ning·o ong·a. Maini a·sel Assam-mangmang neng·nikaniko man·na nanga?” ine ua sing·doaha.
Uandake, Salgro-Salaram a·doko donggipa a·brirangni jatrangni neng·nikanirangko namatna bilakgipa ja·kurangko ma·mong sorkari-oni de·ja dipetnade jegalanirangko dakangkugen ine Bhattacharya mikrakataniko on·angaha.
Na·simang iakoba nina man·gen:
Na·simang iakoba poraina man·gen: A·songni nisanko mande ra·janina Assam-o headmistress-ko rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
