Shillong, May 12: National People’s Party-ni candidate aro Khasi Authors Society-ni President Dr. DRL Nonglait, bebe gita ua Parliament-ona seokako man·genchim ong·ode uni mongsonggipa miksonganiara Indian Constitution-ni Eight Schedule-o Khasi ku·sikko chapatpaanian ong·gen ine aganangaha. Shillong Lok Sabha-ni bye-election-na Eastern West Khasi Hills-ni Nongshillong-o uni skanggipa campaign-ko ong·atanio, Khasi Authors Society bang·a bilsirangna darang political party-ni dakchakani grian Khasi ku·aganani aro sea jotaniko ripinge rakkina kamrangko ka·baenga ine aganangaha.
Meghalaya a·doko Khasi ku·sikko official language dakataniara dal·begipa chu·sokaniko man·ani ong·genchimoba, uamangni mongsonggipa miksonganide ian Indian Constitution-o ia ku·agananiko ra·chakaniko man·atpaanian ong·a ineba Dr. DRL Nonglait janapataha.
Meghalaya-ni Skotong Minister-rang aro MP-rangni gisepo ku·monggrikanirang chu·ongjani a·sel ia dabianiara bilsi 1992 bilsioni ru·utatako man·baaha ine ua u·iatangaha. Skotong Minister Conrad K. Sangma, ia dabianina chakpaaniko on·engon, bebe gita a·dok sorkari aro MP-rang mingsa miksonganina apsan ku·rangko on·genchimode, changsaode Indian Constitution-ni Eight Schedule-o Khasi ku·sikko chapatpana gita man·genchim ineba ua agandapangkuaha.
DRL Nonglait, bebe gita Khasi ku·sikko Constitution-o ra·chakaniko man·genchimode ian Khasi chatro chatrirangna bang·bata janggi tangani cholrangko nakatatna dakchakaniko on·gen ine aganangaha. Iani gisepon, UPSC porikkarangko chatro chatrirangna Khasi ku·sikchi sena on·enba bang·a Khasi chadamberangko IAS, IFS aro ISS officer-rang ong·na dakchakgen ineba ua agandapangkuaha.
Ia campaign-ko ong·atanio Deputy Chief Minister-rang chong·motan Prestone Tynsong aro Sniawbhalang Dhar baksana party-ni dilgiparang, party worker-rang aro uamangna chakpagipa manderangba dongpae bak ra·angpaaha.
Na·simang iakoba nina man·gen:
Na·simang iakoba poraina man·gen: Ri Bhoi a•jani Bhoirymbong-o Eri Yarn Manufacturing Unit-ko CM oprake on•a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
