Shillong, Sept 26: Re·baenggipa October ja dipet Shillong-oni Agartala-ona Flybig airline, sildoreng bilruraatgnok ine Flybig-ni CMD Sanjay Mandvi, kobor ra·timgiparangna parakataha.
Mandvi-ni parakatani gitade, Shillong-oni gipin a·dokrangonaba Flybig airline, sildorengrangko bilruraatna miksongenga aro ia chango uamang Shillong-oni Agartala-ona sildoreng bilruraataniko October jaoni a·bachengatna tik ka·manaha.
Ia apsan Flybig company-an re·anggipa bilsio Shillong-oni Delhi-onaba antio changgni ka·e sildorengko watna a·bachengahachim indiba ja·mano COVID-19-ni a·sel sildoreng bilruraaniko dontongenba da·o a·bachengtaiengahachim.
Indake ong·engon Meghalaya a·dok baksa cultural aro Tourism exchange program-rangko ong·atna miksonganio dambri African a·songrangko dilgiparang Shillong-ona re·baaha aro iana Flybig Airline-ni gita tangka paisarangko dakchake on·aha.
Zambia, Kenya, Malawi aro Tanzania-ni High commissioner-rang, salgittamna Meghalaya a·dokona re·baaha aro aro ian Meghalaya a·doko Tourism-ko tang·doatna dakchakani ong·gen ine ka·dongsona man·enga.
Iani bidingo India-ona Kenya a·songni High Commission Ambassador Willy K Bett, an·tangni chanchianiko janapatengon, Meghalaya aro African a·songrangni gisepo jatni gita maiba nangrimanirang dongama dongja uko ua nina nangnikenga ine parakataha.
Meghalaya a·dokona re·baani bidingo Malawi-ni High Commissioner George C Mkondiwa-ba talatangengon, uamang Meghalaya sorkariko gronge iani bidingo agangrikna miksongenga ine parakataha. Apsan daken, Zambia-ni High Commissioner Judith KK Kan’goma Kapijimpanga-ba Shillong-ona re·bana man·ahani gimin an·tangni kusi ong·aniko parakataha. Jatni daka rikani aro tourism-ni gita dingtang dingtang program-rangko sualgrike ong·atani giminba ua aganangaha.
Iani bidingo Flybig Airlines-ni CMD Sanjay Mandavia-ba an·tangni chanchianiko janapatengon, ian Meghalaya a·dokoo Tourism-ko tang·doatna dakchakani ong·gen ine parakataha.
