Shillong, Feb 9: Special Central Assistance-ni ning·o dingtang dingtang project-rangna tangka-paisarangko nangengani gimin ma·mong sorkarini dakchakaniko am·na a·dokni skotong minister Pa Conrad Sangma baksana Meghalaya Assembly-ni agan-chalaitimgipa Pa Metbah Lyngdoh-maang da·al Mongolbaro ma·mongni Finance minister Ma Nirmala Sitharaman-ko a·songni skotong Delhi-o grongaha.
Union minister-ko grongango, Tura, Nongstoin aro Greater Shillong-na chirangko sale on·ani scheme-o pangchake kamrangko ka·atenganiko, a·doko gital assembly nokko rikatenganiko aro sana-bananiko on·chakram biaprangko tang·doatenganiko aro residential school-rangko a·bachengate on·anirangko a·dokni skotong minister una che·em-che·em talate on·angan baksa, a·dokni dingtang dingtang project-rangna nangdapenggipa tangka-paisa gong kror 200 rangko chamatchinaba ua mol·moljolaha.
Shillong-o rikatenggipa gital Assembly nokni gimin janapengon, re·baenggipa 2022 bilsion rikataniko matchotatna nangenganio skotong minister aro assembly-ni agan-chalaitimgipa Union Finance Minister-ni dakchakanikoba am·jolaha.
“Rikatani kamrang da·o ong·enga aro dongimin somoio iako matchotatna man·gen ine chinga ka·dongsoenga. A·dok sorkari iana an·tangtangni tangkako jakkale gong kror 100 mangko da·o koros ka·aha, aro iako re·baenggipa 2022 bilsion matchotatna man·na gita gong kror 150 mangko nangdapenga,” ine skotong minister aganaha.
Tangka-paisani bidingo pilak bank-rangni mongsongggipa kamo SHG portfolio-ko bak ong·atani gimin gimik bank-rangna agan-kupattie on·anio Union Finance Minister-ni dakchakaniko nangengani giminba skotong minister janapaha.
“Sajinamani somoio, nangenggipa tangka-paisarangko chotchangatgijan on·angachi aro cholgrigiparangna tangka-paisarangko dakchakatachi SHG-rang namen dal·bea daitoko jako ra·e kamko ka·angaha, uni gimin kitikbatgipaona kingkingan tangka-paisarangko sokatanio SHG-rang dal·bea kamko jako ra·e ka·angkuna nangenga. A·dokni songadam biaprango bank branch-rang dongjani a·selo nanggipa tangka-paisarangko on·e dakchakatachi SHG baksa nangrime kam ka·anian namgipa chol ong·chongmotgen,” ine skotong minister aganaha.
Apsandake, a·dokni skotong minister da·al Mongolbar salon Union DoNER Minister Dr. Jitendra Singh, Rail Minister Piyush Goyal, Tribal Affairs Minister Arjun Munda-maangko man·chape gipin ministerrangkoba grongangjolaha.
Union Education Minister Dr. Ramesh Pokhriyal Nishank-ko grongango, tangka-paisarang chu·ongjae kam dondikatako man·gipa Sohra-o da·o rikatenggipa National Institute of Technology (NIT)ni gimin skotong minister una talate on·angan baksa rikatenggipa nokko matchotatna nangdapenggipa tangka-paisarangko on·atchinaba Union Education Minister-o mol·moljolaha.
Da·al salni bako Union Tribal Affairs Minister Arjun Munda-koba skotong minister grongangjole a·dokni project-rangko talate on·anga baksana tribalrangni namgnina ministry-ni dondikgija dakchakanirangko on·engani giminba ua de·mittele aganaha.
Janapjolna gita, Tura-onaba ru·utgijan sokbanasienggipa a·doko niksenggipa Tribal Research Institute-ko man·chape Meghalaya a·dokko namdapatna gita dingtang dingtang project-rangko tribal affairs ministry on·ataha.
