Tura, Feb 9: Bobil dake chakatgipa gitcham, Garo National Liberation Army (GNLA)ni dape donnuanggipa silchidareni bang·a gullirangko Williamnagar jillaoni bang·e chel·gijagipa buringoniko East Garo Hills-ni police sandie man·taiaha.
GNLA-ni commander-in-chief (C-in-C) Sohan D Shira sagini jakkalgipa sniper rifle jean chel·beaoni nisan ka·e gona man·gipa slaini bang·bea gullirangko a·ao dape donako Mongolbar pringo police-rang man·aha ine koborna u·iataha.
“Chinga, ning·joljol koborko man·soe Dorengkigre buringo dape dongipa silchidarerangko sandirikkitatna gita special operation team-ko watataha, indake Mongolbar pringo Williamnagar jillaoni km 20 mangni gitasan chel·gipa buringo donue dape dongipa silchidareni bang·bea gullirangko man·aha,” ine East Garo Hills-ni Superintendent of Police (SP) Bruno A Sangma koborna agan-talataha.
Aganani gita, Dorengkigre buring jolon GNLA bobil dol uamangni sipairangna skie on·aniko dakrongachim aro uamangni ma·chakram biapba ong·achim. Indake, batanggimin bilsi gittamrango GNLA bobil dol ua biapo pilak skie on·anirangko dakate silchidarerang aro gulli-barutrangkoba ua biapni wilwilaon dape donrongaha.
East Garo Hills-ni police-chi sandiate man·gimin bosturangara, chel·aoni gona man·gipa sniper rifle-ni gulli rong 219, tangka dabie segipa lekka kingsa aro walkie talkie-o jakkalgipa ge 53 nachilo sikteke knaani bosturang ong·a.
Garo Hills-o mingsinggipa Durama a·brini bakan ga·akgipa Dorengkigre buringara namen buring diltua aro ua biapan bobil dakgiparangni ma·chakgipa ong·e skango GNLA bobil dol aro a·songko chel·chakgipa sipai dolrangni gisepo gogrikaniba ua biapon ong·ronga ineba koborna talatjolaha.
