Tura, Sept 30: Garo Hills-o donggipa Catholic giljani dal·batgipa Bishop, Bishop Andrew R Marak-ko mija Brisitibar salo ka·tong saani gimin Tura-ni Holy Cross Hospital-o sana-bananiko dakna rimbaaha ine koborko man·soaha.
“Rang·sitna neng·e saa ba pneumonia saani gimin uko Holy Cross Hospital-ona rimbae sana-bananiko dakatenga. Saarang indakpile biljima ong·ja aro namkalbatenga ine doctorrang koborko on·aha. Chinga uni ta·raken an·sengpilanina Nokgipao bi·enga,” ine Tura, Walbakgre-o donggipa Holy Cross Hospital-ni bakan ong·gipa St. Luke’s Giljani Parish Priest aro youth director, Father Lyngdoh Tegite u·iataha.
Bilsi 63-mang gapgipa Bishop Andrew, una skang dilanggipa Bishop George Mamalassary-ni biapko ra·skaenba Garo Hills-ni Catholic Giljako chasonggnirang gapna am·pile dilbaenga. Batanggimin bilsirango ua, sajinma ong·katmiting somoio covid saa baksana be·enni an·senggijanirangkoba man·ahachim.
