Shillong, Nov 4: Batanggimin 2010 bilsio 65 megawatt Rangmaw Hydel Power Project-na MS Energy Limited baksa Memorandum of Agreement (MoA)-o soi ka·grikgiminko Meghalaya Cabinet Butbar salo ra·pilaha.
Iani bidingo kobor segiparangna aganengon, uamangni nikanio project-ko a·bachengatna gita chu·onggijanirang donganichi company-an iako ra·pilchina sorkario mol·molaha ine dakchakgipa skotong minister Pa Prestone Tynsong aganengon, apsan project-ko matchotate on·na sikgipana gital dake u·iatanirangko on·angtaigen ineba u·iatjolaha.
Indake ong·engon, ia project-na gitik-gitaksa soikoba ka·grikahachim ine Pa Tynsong aganaha.
MeECL-oniba ia project-ko a·bachengna gita chu·onggijanirang dongako nikaha ine ma·sigipaoni Hub News-na agan-talataha.
Janapna gita, batanggimin 2010 bilsio, Build Own Operate and Transfer (BOOT)o pangchake chioniko bijolini bilko bikotna gita dolsa private company-na pakwatman·jokchim. Indake ong·oba, kamko a·bachengna uamangni nangnikani kri porikka ka·e niangani ja·mano company Meghalalya sorkari baksa MoA-o soi ka·anggiminko ra·pilchina gita mol·molataha.
St Xavier’s University Bill-ko Meghalaya cabinet ra·chaka
Education department-ni chanchina ra·bagipa aro Catholic Giljani Jesuit (Society of Jesus)chi chalainasienggipa St Xavier’s University Shillong Bill, 2020-ko mijal Butbar salo ning·tue chanchirimani ja·man Megahalaya Cabinet ra·chakangaha.
St Xavier’s, ian a·songo namen chu·sokenggipa university-rangoni ge·sa ong·a ine aganenba, ia Bill-ko da·al Bristibar saloni a·bachengenggipa A·dok Assembly-ni autumn session tom·anio jinma chanchirimaona ra·bagen ine dakchakgipa skotong minister Pa Prestone Tynsong kobor segiparangna aganaha.
Assam-o Don Bosco University ko bimang ong·atan ja·mano St Xavier’s University-ko Meghalaya-o a·bachengatskaani nama gadango skie on·aniko a·dokni manderangna ra·bagnok ineba agandapaha.
Da·odipet Meghalaya a·doko ma·mongni university North Eastern Hill University (NEHU) mangmangsan dongkuaienga ine nikatna man·gen.
