Raksamgre (West Garo Hills), June 13: West Garo Hills a·jani Raksamgre Sub-Divisionni ning·o nokking 90mang donggipa Rengigre songo mingsa chanchisogijagipa obostako nikna man·aha, chong·motan post-mortem porikka ra·na ine gopgimin manggisiko bilpilaniko dakaha.
Sianggipa Pirot R. Marak April 14 tarik 2025-o janggi galaha aro uko salgipino uni nok sambaon gopaha. Uandake May 29 tariko, Pirotni adatang Oman R. Marak uni sianganiko mande jak donga ine potchipe FIR-ko segataha.
FIR-o janapani gitade, Pirot-ara Nennen R. Marakko bia ka·ahachim, indiba uamangni jikse ong·e donganio, Nennen-ni Reknan K. Sangmako sel·ani a·sel nokdang tom·tomna man·jachim. Uamangko agan-skie ra·na ine nokchame dolgnian changni chang tom·anirangko dakahachim.
Nennen aro Reknan salbrina seke kate, Pirotni siani sal April 14 tariko nokona re·bapilaha. Ua salo Rangsa aro Raksam dolgnian Rengigre-o Pirot aro Nenen-ni noko tom·e uamangko namatpilna jotton ka·aha ine Oman R. Marak janapaha. Pirotni be·eno mamung saani dongjachim aro uan sokgipa mahari-ma·drangnaba song·e-channe on·aha ineba ua aganaha.
Mahari-ma·drangni wate re·angani ja·mano, uni nokni manderang Pirotni rang·gitik siani koborko man·soaha. April 15-o, uko gopna skang uni nokni manderang Pirotni be·en aro mikkango mata-buani chinrangko nikaha, indiba post-mortem grian uko gopaiaha. Jonggipani siani bidingo gisiko dongtogijaniko man·e iani bidingo sandina Oman R. Marak FIR-ko segataha.
Uandake, West Garo Hillsni Executive Magistrate Dr. Rikrak N. Marakni ning·o, Pirotni manggisiko bilpilaha, aro uno Tikrikkila Police Stationni officer in-charge Rogarius G. Momin aro Rengigre-ni Sordar Marvinson T. Sangma-ba dongpaaha. Grade 1 Sub-Divisional Medical and Health Officer Dr. Silang Lama Rongrokgre post-mortemko ka·aha.
Oman R. Marak aro uni mahari-ma·drang Pirotni sianio mande jak donga aro uamangna kakket bichalko nanga ine Hub News-na parakataha.
Nennen R. Marakko Hub News-ni sing·e niskaon, uni kosako on·gipa pilak matnanganirangko ua jechakskaaha. Reknan K. Sangma baksa ua bilsisa skang mikchaachim indiba da·ode mamungba dongjaha ine, Reknanko seke katja indiba ma·drangrangko grongnasa re·anga ineba ua janapaha. Una agreba, uni segipa uko amitrongachim, aro manggisio mamung mata-bua dongja aro uandaken mamung a·sel nanga gri uko gopaniko dakaha ine ua talataha.
Post-mortem ka·aniko matchotaha, da·o reportna sengengkua, aro uko man·joko dilgiparang aro nokni manderang uamangni aganchakanirangko man·gen.
Na·simang ia video-koba nina man·gen:
Na·simang iakoba poraina man·gen: Ku·mitu ra·anina NEHU Proffessor ko CBI rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
