New Delhi, July 13: Re·anggipa jao Haryana a·dokni Gurugram-o Nagaland a·dokni chadambe sakgni ong·na kragija siangahani gimin salgro salaram a·dokoni dingtang dingtang dolrang, Union Home Minister Amit Shah-na sedoatani ja·man, ia a·selni bidingo am·sandina gita ma·mongni Home Affairs Ministry, Central Bureau of Investigation (CBI)-na pakwate on·anggnok.

Official-rangni kobor on·ani gitade, ia a·selni bidingo am·sandianiko dakna gita Home Affairs Ministry, da·o adita salni gisepon CBI-na pakwate on·atgnok.

Re·anggipa jao Nagaland a·dokoni Rosy Sangma minggipa A·chik me·chik saksa, Gurugram hospital-o siangani ja·man uni bak nanggipa Samuel Sangma-ba ong·na kragija dake salgipino siangskaahachim ine nikna man·a.

Ia a·sel ong·ani ja·mano Meghalaya, Nagaland aro salgro salaramni dingtang dingtang a·dokrango raken jegalanirangko daktokenba, ia a·selni bidingo kakketko ma·sina man·na gita CBI-chi am·sandiatchina dabitokengachim ine nikna man·a.

Ia a·selni bidingo Meghalaya a·dokni Chief Minister Conrad K Sangma, Tura-ni MP Agatha K Sangma aro a·dokni opposition dolko dilgipa Mukul Sangma-ba jegalate, ma·mong sorkarina sedoatahachim.

Indake ong·engon, da·o ia a·selni bidingo am·sandina gita dingtangmancha CBI-na pakwate on·na tik ka·ahani gimin a·dokni Chief Minister Conrad K Sangma, ma·mongni Union Home Minister Amit Shah aro Union Home Ministry-ko mittelpilataha.