Aizawl, June 30: Mizoramni Skotong Minister Pu Lalduhoma a·dokko dilgiparangko saksa sakgipin baksa bakrimani aro mande ra·grikaniko dakna ku·mongrimaniko on·aha. Aizawl-ni Lamnual-o state-level Remna Ni-ko (Mizoram Peace Accord Day) maniani somoio, je party-ba sason-o ong·genchimoba, a·dokni manderang ma·mongni manderang baksa kam ka·anio name bakrimna nanga, aro polictis-ko mande ra·grikanichi dilna nanga ine jinmana parakataha.
Ia manianiko Mizo Zirlai Pawl (MZP) General Headquarters dakdile, bilsi 20-na burungni manderangni jingjengataniko bon·atna aro a·doko pangkamgipa tom·tomani pangchakaniko songna, itihas-o gisik ra·na krabegipa 1986 Mizoram Peace Accord-ko soi ka·aniko gisik ra·atpilaniko dakaha. Skotong Minister mongsonggipa sokgipa ong·aha aro unbaksa uni jikgipa Pi Liansailovi-ba re·baaha.
Mizoram-o namgija kamrangko ka·giparangoni atagrikni gitade a·palonni niam-gri songdonggiparangsa ong·a ine adita salrangna skang Union Home Minister-ni agananiko janape, bang·gija manderangni dakgualanirang pilakni gualani ong·ja ine pilak niam-gri songdongenggipa manderangko, a·dokni niamrangko mande ra·e ja·rikchina aro tom·tomaniko rakkichina ine skotong minister mol·molaha.
Remna Ni-ni nisanko songdoani ja·mano, 1st Battalion MAP Brass Band, “Ro Min Reksak Ang Che”-ni sulrangko doka-dam·aha, aro uno a·gilsak gimikni Zo manderangko, dingtang dingtang manderang bang·genchimoba ku·cholsan janggi tangna aro ku·mong-nangrimna didiaha.
“Tom·tomanian pilak silroro-namroroani pangchakani. Mizoram-o tom·tomaniko rakkina aro gipatna angni sorkari mamung cholkoba galjawa,” ine ua parakataha.
Mizoram-o bang·a dal·dalgipa daka-rikanirangko daknasiengaha, mongsongbate a·dokni salgro aro salgipengni gisepo sorokrangko tarinasiengaha ine CM manderangna parakatan baksa, ia kamrangko ra·baengon, dingtang dingtang jatrang aro toromrangni manderang baksaba meli-nangrimna tarisona nanga ine ua aganaha. Unbaksana, a·songna ka·sae saksa sakgipinko de·doe, mikbu-miknengani gri a·songna ka·sana nanga ineba ua Mizo manderangko mol·molaha.
Uandake, Remna Ni-ara politics-chi bak ka·aniko nangrimate, tom·tomaniko ra·bagipa manderangko mande ra·na maniani ong·a, aro ia sal-ara batanggimin salrango rasong chaani ong·ja indiba neng·e man·gimin tom·tomani boksis-ko mitele ra·chaksoani ong·a ine MZP-ni President Pu H. Lalthianghliama aganaha.
Ia tom·bimonganiko MZP-ni Vice President Dr. C. Lalremruata dilaha, tom·ani a·bachengao Council of Churches of Mizoram-ni Rev. Dr. Lalmangaiha Isolo bi·aha aro MZP-ni General Secretary Pu Chingkhanmanga Thomte reportko manderangna parakataha.
Dingtang dingtang dal·dalgipa manderang jekai Home Minister Pu K. Sapdanga, Ministerrang- Pu B. Lalchhanzova aro Pu F. Rodingliana, Deputy Speaker Pu Lalfamkima, Adviser to the Chief Minister Pu Lalmuanpuia Punte, aro gipin senior officialrang ia manianio bakko ra·angaha.
2018 bilsioni, MZP tom·tomanio on·gilgipa manderang aro dolrangko mande ra·aniko dakbaenga, indiba ia bilside darangkoba mande ra·aniko dakani dongja.
Na·simang ia video-koba nina man·gen:
Na·simang iakoba poraina man·gen: Tripura jail-o mande saksa siani ja•man so•sojengjeng ong•a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
