Tura, Jan 9: State Bank of India (SBI), Regional Business Office (RBO),Tura aro A·chik Heritage Pursuits (AHP) baksa nangrime Corporate Social Responsibility (CSR) Scheme-ni gita song dam 7-ni manderangna dingtang dingtang bosturangko Sonibar salo suale on·angaha.
Bosturangko suale on·ani salo, SBI-RBO, Tura-ni Chief Manager, Anjana Arengh, SBI RBO, Tura-ni Assistant General Manager Dharmanadha Banai aro SBI-RBO Chief Manager, Madhusudan Kisan aro AHP-ni dilgiparang dongpaaha.
Ua dam 7 songrangara Chiwatigre, Mandalgre, Rongkinggre, Bandigre, Rongchek Manda, Rongchek Chambugong aro Ampanggre ong·achim.
A·chik a·songni diltugipa songrango dongenggipa manderangni janggi tangani gadangrangko ra·dona aro namroro silroroatna miksonganio songsalna dangdike on·enggipa dol aro SBI sin·kario pine tusiani gombol (blanket), pressure cooker, poraienggipa bi·sarangna sechakani lekkarang, torch light aro tupirangko suale on·angaha.
“Corporate Social Responsibility (CSR)-ara chingni bank-ni, bilsiantio Bank-ni lap man·anioniko mitam percentage-ko songni nokni kamna ba society-na bak on·pana organisation-ni ku·rachakaniko dakpaani ong·a. Iako Bank dingtang dingtang branch aro region-rangni gita ong·atronga. Uandake ia changoba bilsi gitalo Bank-ni dingtang dingtang branch ba regional office-rangni gita Corporate Social Responsibility-ni kamrangko ong·ataha aro uandaken, SBI Regional Office Tura-ni gitaba chinga A·chik Heritage Pursuits (AHP) dolming nangrime song damsnini manderangna dingtang dingtang jakkalani bosturangko suale on·aha,” ine SBI-RBO, Tura-ni Chief Manager, Anjana Arengh parakataha.
Uni gisepon songsalna dangdike on.enggipa dol A.chik Heritage Pursuits-ko re.anggipa 2018 bilsini September 18 tariko bikotaha. Ia dolko bikotani miksongara ning.tugipa songadam nokadamrango janggi tangenggipa manderangni bewalrangko ra.dona miksongani ong.achim. AHP-ko bikotchengaoni dingtang dingtang government department-rang baksa bakrime kamrangko ka.engaha. Re.anggipa bilsirango Sakal A.duma aro Daribok songrango manderangna dongchakani A.chik nokrangko rike on.aha aro saoba uano waltuna nangode uamangna tamburangko on.na tarie donenga.
AHP da.aloba song dam 7-ni manderangna dingtangdingtang bosturangko suale on.angaha aro ia program-ko ong.atanio Tura-ni SBI-RBO, dakchakaniko on.pahani gimin AHP dingtangmancha SBI-ko mitelangaha.Apsan dake re.anggipa bilsioba AHP songni manderangna indakgipa dakchakaniko on.angaha aro ua somoio Tura-ni man.e cha.gipa manderang dakchakan baksa AHP-ni membor-rangba on.gilaniko dake kamrangko ka.engaha.
Unbaksana AHP, gital project ge.sa jean A.sim Picnic Spot (APS) ba picnic cha.ram biapko Rombagre songo a.bachengattaiaha aro ianona bang.a manderang biap nina aro picnic cha.na re.batokenga.Uandakgipa miksonganio songsalna dangdike on.na aro a.ba o.e cha.aniko bon.atna kam ka.anian AHP-ni miksongani ong.a ine AHP dilgiparang aganaha.
