Shillong, Dec 12: Sukrobar salo, Meghalaya a•dokni Chief Minister Conrad K Sangma, Lawmali-ni Old Pasteur Institute-o chalaienggipa Shillong Medical College-ko nina re•angenba, medical college-ni skanggipa batch-o poraienggipa chatro chatrirang baksa agangrikangaha. Shillong Medical College-ko nieanio Chief Minister baksa a•dokni Health & Family Welfare Minister Wailadmiki Shylla aro Health department-ni official-rangba dongpaaha.
Shillong Medical College-ko nieanio, ia college-ni skanggipa batch-o poraienggipa chatro chatrirangko gronge agangrikna man•ahani gimin a•dokni Chief Minister an•tangni kusi ong•aniko parakataha aro ia Shillong Medical College-ara Meghalaya a•dokna namen gamchatbegipa institute ong•enga ine aganaha.
Shillong Medical College-ko a•songni Prime Minister Narendra Modi-chi kulie on•china ua an•tangde nangnikengachim ine janapatengon, ia medical college-ko name kulie on•na gita uamang sengkuengoba ua college-o kam ka•enggiparangko aro chatro chatrirangko grongna skani gimin da•alo grongna re•baaha ine Chief Minister aganaha.
Shillong medical college-ko kulianio a•dokna namen ra•biani kam ong•aha ine janapatengon, ia college-ko bimang ong•atna gita rakbee kamko ka•ahani gimin ua dingtangmancha, a•dokni gitcham Health Minister Ampareen Lyngdoh aro Health Department-ni official-rangko mittelpilangaha.
Ia medical college-o kam ka•na gita an•tangtangko on•kange re•bagipa doctor-rangkoba Chief Minister mittelpilangaha.
Shillong Medical College-ni chatro chatrirangna aganprakengon, uamangkon ia Shillong Medical College-ni skanggipa batch ine gisik ra•na siengani gimin ian uamangna namen gisik ra•beani somoi ong•gen ine Sangma aganaha.
Chatro chatrirangni neng•nikanirangko chagrongna nanggenchimoba sorkari, uamangna pilak nanga dakchakanirangko on•gen ineba Chief Minister, ka•dongatani kattarangko aganangaha.
Na·simang iakoba nina man·gen:
Na·simang iakoba poraina man·gen: Gital Meghalaya Assembly building-o December jani 19 tariko skanggipa Pre-Christmas-ko ong·atgen
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
