Shillong, Mar 25: Skanggipa changna ong•atenggipa Shillong International Film Festival-ko Budbar salo, Meghalaya a•dokni Chief Minister Conrad K Sangma, Shillong songjinmani State Convention Centre-o a•bachengate on•angaha aro ia film festival-ko a•bachengatanio, a•dokni Information & Public Relations Minister Lahkmen Rymbui, Chief Secretary Dr Shakil P Ahammed, Information & Public Relations-ni Commissioner & Secretary Vijay Kumar Mantri, jawilwat tarigiparang aro gipinrangba bak ra•angtokaha.
Ia film festival-ko do•ga oe on•anganio a•dokni Chief Minister, tom•anio bak ra•giparangna aganprakangengon, skanggipa changna ong•atenggipa Shillong International Film Festival-ko sokachakna man•ahani gimin kusi ong•aniko parakangenba, a•dokni chadamberang changgipa sapgiparang ong•genchimoba cholrang dongjani a•sel an•tangtangni changa sapanirangko mesokna man•jaengani gimin ru•uta somoirangonin iandakgipa program-ko sorkari ong•atna miksongani dongachim ine aganaha.
Film Industry ba jawilwat karkanao actor-rang gitasan ong•aigija, jawilwat tarigipa, ostrorangko tarigipa, chrokna skigipa, chola ba•rarangko tarigipa, dokna dam•na changgipa, garirangko salgipa aro dingtang dingtang manderangna bang•en cholrang donga ineba Chief Minister aganaha.
Meghalaya a•doko songdongenggipa manderangoni 50 percent-de bilsi 20-na komigiparangsa ong•a ine gisik ra•atpiltaianiko on•angengon, chadambe sakantina kamrangko tikate on•anio sorkari, bang•en neng•nikanirangko man•engani gimin dingtang dingtang cholrangkoba chadamberangna on•na nangenga ine Chief Minister aganaha.
Meghalaya a•doko jawilwat tarigiparangko mittelpilangskaengon, a•doko bang•bata manderangan maming skie ra•ani gri aro tangka paisani gita dakchakani gri an•tangtangsa tikkele chu•sokgiparang ong•angenga ine Chief Minister aganenba, jawilwat tarianioba a•doko changgipa sapgiparangko ong•katatna nangengaha ine parakataha.
Ia tom•anio a•dokni Information & Public Relations Minister Lahkmen Rymbui-ba jinmana aganprakengon, batanggimin bilsi 10-ni gisepo Meghalaya a•dokoba jawilwat tarianirang tang•dobaaha ine a•doko jawilwat tarianichi, economy-ko tang•doatchina ku•pattianiko on•angaha.
Ia salgittamna ong•atenggipa Shillong International Film Festival-o salgro salaram a•dokrangoniko seokgimin ming 18 jawilwatrang baksana Bhutan aro Vietnam a•songni jawilwatrangkoba mesokenga.
Na·simang iakoba nina man·gen:
Na·simang iakoba poraina man·gen: St Edmund’s College, Shillong, Kolkata-ni Emporium Training and Consultancy Pvt. Ltd. baksa MoU-ko soi ka·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
