Tura, Feb 24: Meghalaya a⋅dokni skotong Minister Pa Conrad K Sangma, South West Garo Hills-ni Salmanpara Multi Facility Centre-o game cha⋅gipa dolrangna cheque-rangko on⋅angaha. Program-o Boldamgre-ni MDC Pa Stivie Marak, Nogolpara-ni MDC Linekar Sangma aro gipin District-ni officer-rangba dongpaaha.

Tom⋅anio aganengon, Pa Sangma FOCUS program-ni miksonganiko kan⋅dike talatan baksa, tangka paisako sorkarioniko ra⋅sroa ong⋅gija uan dakchakaniko on⋅enggipasa ineba talatjolaha. Ma⋅mong sorkari ia apsan dakanggipa scheme-rangkoba done tangka gong crore 700-ko on⋅aha jeon me⋅chikrang, game ge⋅e cha⋅giparang aro chadamberang janggitangani cholrangko dakna man⋅gen ine agana baksa game ge⋅e cha⋅giparang tangka paisachi dakchakaniko nangengode Integrated Village Cooperative Societies-ni gita ba am⋅na man⋅a ineba Pa Sangma aganaha.

Tangka paisa-chi dakchakaniko am⋅engon, ge⋅e game bite-ko bang⋅batate man⋅asan ong⋅aija indiba janggitangani cholko namdapatan baksa ge⋅e game cha⋅ani gadangkoba nambatatna nanga ineba agandapaha.

Ge⋅gipa gamgipa dol 32 jeon sak 424 member-rang dongode tangka gong lakh 21 hajal 10 tangkarangkoba sorkarioniko man⋅gen unigimin ka⋅rimskarangko dol dakchinaba ui⋅ataniko on⋅angaha. Ua program matchote game cha⋅enggipa dolrang baksaba agan golpogrikaniko dakangaha. Zikzak Block-ni ning⋅o donggipa dol 42 game cha⋅gipa dolrangnaba FOCUS program-ni gita tangka gong lakh 27 hajal 80-ni cheque-ko on⋅angaha.