Shillong, Dec 5: Mongolbar salo, Shillong songjinmani U Soso Tham Auditorium-o ong•atanggipa Social Welfare department-ni DREAM aro BUILD program-rango, Meghalaya a•dokni Chief Minister Conrad K Sangma bakko ra•angaha aro ia program-o Chief Minister baksana a•dokni Social Welfare Minister Paul Lyngdoh, Health Minister Ampareen Lyngdoh, Mawkyrwat-ni MLA Renikton Lyngdoh, a•dokni Director General of Police (DGP) Dr LR Bishnoi aro gipin official-rangba bak ra•angtokaha.

DREAM program-ara Drug Rehabilitation, Elimination & Action Mission-ko kan•dike seskagipa katta ong•a aro BUILD program-ara Bringing Unity, Locale Against Drugs-ko kan•dike seskagipa katta ong•achim. Ia program minggnian drugs jakkalaniko bon•atna aro drugs jakkalgipa manderangko namatpilna gita Social Welfare department-ni ra•gatgipa program-rang ong•a.

Ia program-ko ong•atanio a•dokni Chief Minister, jinmana aganprakangengon, a•doko aro a•songo chadamberangan dingtanganiko aro namroro silroroaniko ra•banagipa cholrang ong•ani gimin chadamberangko namao nirok sandina gita sorkari, dingtang dingtang program-rangko a•bachengataha ine parakangaha.

Bi•sarangko somoi gita name nirok sandianirang dongjani a•selan bang•bata chadamberangan pekatgipa samrangko jakkalanirango sokangronga ine janapatengon, chadamberangko iandakgipa ong•gija ramarango dilsretangjana gita sorkari, chadamberangko kal•susaani, doka dam•ani aro bading chiwalani kamrango bak ong•atna rake kamko ka•enga ine Chief Minister parakataha.

Social Welfare department-ni DREAM aro BUILD program-rangko chu•sokgipa ong•atna gita a•doko songdongenggipa manderangkoba sorkari baksa bakrime kam ka•china Sangma didiangaha.

Ia tom•anio a•dokni Social welfare Minister Paul Lyngdoh-ba jinmana aganprakengon, Meghalaya a•doko drugs jakkalaniko chu•gimik bon•atsrangna gita sorkari rakbee kamrangko ka•enga ine janapatenba, a•doko drugs jakkalaniko warachakanio bakrimanirangko on•engani gimin dingtang dingtang NGO-rangko, mondolirangko aro dingtang dingtang gittimni dilgiparangko mittelpilangaha.

Jolo drugs jakkalgipa chadamberangko namatna gita kamrangko a•bachengatahani gimin ia tom•anio Mawlai Dorbar-na a•dokni Chief Minister, gong lak 6-ni cheque-koba on•angjolaha.

Iakoba poraie nina man·gen: Manipur a•doko sak 13 manderangni manggisiko man•a