Shillong, April 24: Re•baenggipa May 10 tariko ong•atna sienggipa Sohiong Assembly election-na kamrangko ka•soengaha aro ia election-ko ong•atani bidingo District Election Officer, Returning Officer aro Police-rang baksaba tom•e chanchirimaha ine Sombar salo, Meghalaya a•dokni Chief Electoral Officer (CEO) FR Kharkongor parakataha.
Sohiong election-ara inditana bilake kamrangko ka•sona nanggipa election ong•jaenga indiba ia election-na Ministry of Home Affairs aro Election Commission, dolbonga Central Armed Police Force (CAPF)-ko watataha ineba Kharkongor parakataha.
Ia election-na manderangni jakkalgipa silchidarerangko chipe donatchenggipani gimin janapatengon, ia election-na pong 60-mangni gita silchidarerangko police station-rango on•eaha ine CEO parakataha.
Kharkongor-ni parakatani gitade, Sohiong constituency-ni ning•o damgittam check point-rangko done, manderangni re•ruraanirangko nirikkienga aro election-na donatgimin sector officer aro zonal officer-rangba polling station-rangko re•rurae nirokenga.
Sohiong constituency-o dam 63-mangni gita polling station-rang donga aro ia constituency-o sak 34,000-na baten pu•ongiparang donga.
Iakoba poraie nina man·gen: Tura-ko Winter Capital songchina dabianio TGCSU-ba chakpaanio on•a
