Shillong, Jun 8: Madhya Pradesh a·dokoni re·bagipa Raja Raghuvanshi aro uni jikgipa Sonam-ni Sohra jolo gimaani ja·man segipani sogimin manggisiko Weisawdong Falls samba jolo donggipa a·silangoniko man·ahaoba jikgipakode da·alonan man·skakujaengani gimin manderangni gisepo adita sing·anirang ong·kataha.
Ia a·selni bidingo talbate ma·sie ra·na gita Hub News, Raja aro Sonam sakgniko apsan nikgipa Nongriat songona re·angaha aro uano, local guide Bahkupar Wansai aro uamang sakgnini waltugipa Shipara Homestay-ni nokgipa Sianti Sohklet baksa agan-golpogrikna cholko man·aha.
CCTV-o mesokani gitade, uamang jiksesa, May 22 tarik salni 12:44 bajio Manha Hotel-ona Yamaha Ray Z scooter tangsimo sokangaha indiba hotel-o kuturiko man·jae ja·mano uamang an·tangtangni ra·anggipa bakosko hotel-o donenba, Mawliangkar-ona scooter-o re·angaha. Mawliangkar-oni uamang Wansai-ni dilanichi, Nongriat-ona ja·achi re·angaha aro Nongriat-ona attamni 5:00 ba 5:30 bajimangni gisepo sokange, Shipara Homestay-o waltueaha.
Tour guide Bahkupar Wansai-ni Hub News-na aganani gitade, uamang attamchibarasa uamangko Nongriat songona dilangna gita okamataha aro ua, uamangko jechakgijan homestay-ona dilange doneaha. Salgipinode uamang local guide-ko nangjawaha ine Wansai-na aganataha.
Shipara Homestay-ni nokgipa Sianti Sohklet-o sing·sandiskaon, ia jiksesa, bag chongipa aro bakosa ge·sakosan ra·e Homestay-ona re·baaha indiba miattam cha·manen uamang tusina napangaiaha ine aganaha. Pringgipin, chong·motan May-ni 23 tariko uamang pring 5:30 ba 6:00 bajimangon, cha·gija ringgija homestay-oni ong·katangaiaha ineba Sohklet aganaha.
Homestay nokgipani aganani gitade, homestay-o dongmiting somoirangoba uamangni gisepo maming jegrikani ba meligrikgijani chinrangko nikna man·jaha aro police-rang untalan ia homestay-ni guest register-ko am·sandina ra·angaha.
Bon·kamgipa phone-o agangrikani
Homestay-oni ong·katangani ja·man Sonam, Raja-ni ma·gipa baksa bon·kamgipa changna phone-o agangrikaha aro phone-o agangrikaniko knasona man·ani gitade, uamang ua somoio a·briko doangengmiting chacha gita rang·sisokgija ong·engachim aro Raja-ko una skang re·angsoaha ine niogipana aganatengachim. Uni iandake aganani ortode ua somoion uamang apsan ong·jaha aro ua coffee namjani gimin aro a·briko dona nangengoba ua okumu chakenga ineba niogipana aganataha.
Indake ong·engon, ia jiksesako May-ni 23 tarik pring 10:00 bajimango, Mawlakhiat-chipakna doangengmiting somoio ma·sina man·gijagipa gipin tourist sakgittam baksa nikrikaha ine Tour guide Albert Pde parakatskaaha aro ian a·sel ong·anio bang·en sing·anirangko ong·katataha.
May-ni 24 tariko Raja aro Sonam-ni para ra·anggipa scooter-ko Sohrarim-o gale donako man·aha aro June-ni 2 tariko Raja-ni tong·sa sogimin manggisiko, scooty man·gipa biaponi km 16-mang chel·ao donggipa Wei Sawdong Falls sambani a·silangoniko man·aha. Manggisi man·gipa biap sambaoniko atte aro nosto ong·gimin phone-koba man·aha. June-ni 3 tariko, Sonam-ni ong·na nanga ine chanchichipenggipa raincoat kingsakoba police-rang, Mawkma-oniko man·aha.
Ia Wei Sawdong jolrangko, a·ani bidingo golmalrang dongani gimin batanggimin bilsirangonin tourist-rangna chipe donaha indide uamang maikai ia biapona sokangna man·aha, ian dal·bea sing·ani ong·kataha.
Minggipin sing·anirangara, a·bri doangengmiting somoio maini gimin uamang dingtang dingtang re·aha? Mawlakhiat-chipakna doangengmiting somoio uamang baksa nikrikgipa tourist sakgittamara sawarangchim? Maikai Raja, Wei Sawdong Falls sambao saksan so·otako man·aha?
Da·o Sonam-ko sipai dolrang dingtang dingtang biaprangoniko sandikuengon, ia sing·anirangna aganchakaniko manderang sengengkua.
Na·simang ia video-koba nina man·gen:
Na·simang iakoba poraina man·gen: WGH-ni Badminton Association bol ge·aniko a·bachengata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
