Baghmara, July 22: Ge·e-game man·anirangko a·palrangchina watatani bidingo South Garo Hills a·ja ta·raken tang·dobaroroenga ine nikna man·enga. Adita somoirangna skang, Siju sepangjoloni Rongsu Agal-oni komilla-rangko Dubai-ona watataha, uandake da·o apsan a·jaonikon gulmoris-rangkoba a·palchina watataha.
South Garo Hills-ni game cha·giparang metric ton chikkung namgipa rokomni gulmoris-rangko July 21 tariko Mumbai-ona watataha. Ia gulmoris-rangni dam lak 64 ong·a aro uko Sundardas Rathansey Spices Private Limited-ona watataniko PRIME Meghalaya initiative-ni ning·o dakaha.
Ia gulmoris-rangko Eman Gatabil aro Denggagre Integrated Village Cooperative Society-rangoni (IVCS) sak 200 game cha·giparangoniko chimonge Emangre-oni watataha. Uano District Horticulture Officer Tahsri M. Momin, PRIME Baghmara DPM Brilliar Ch. Sangma aro IVCS memberrang donge nirikaha.
Ian South Garo Hills-oni gulmoris-ko Mumbai-ona watatanio itihas-o skanggipa chang – aro ia kari-na bon·kamgipa chang ong·enga.
Ru·utgija salrangna skang, game cha·giparang badinggiparangna palskaanirangko dake kg-prako gong 550-570 tangkarangkosan man·aiachim. Indiba Integrated Village Cooperative Society-rangko bikotaoni aro PRIME Meghalaya-oni palna-sim·na cholrangko sandie on·aoni, uamang da·o bregiparangna palatna man·a bang·bata tangkarangko man·enga.
“Ian game cha·giparangna namen katchaani sal ong·a. Uamangni ge·e-game man·anirangko da·ode bregipaona joljol watatna man·engaha,” ine PRIME Baghmara-ni DPM, Brilliar Ch. Sangma aganaha.
“Chingni ge·e-game cha·e man·anirangko a·palchina watna cholko on·anina chinga skotong minister Dr. Conrad K Sangma-ko mitela,” ine Eman Gatabil IVCS-ni Haggai G. Momin aganaha.
Ia gulmoris-rangko a·palchina watna man·aniara game cha·giparangni man·gnirangko bang·batatani aro Meghalaya-o ge·e-game man·anirangko a·songni gipin biaprangna watani gitalgipa chol ong·a ine nikna man·enga.
Na·simang iakoba nina man·gen:
Na·simang iakoba poraina man·gen: W’nagar-o so•ota man•gipa me•trana mombati so•e tom•aniko ong•ata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
