26.3 C
Tura
spot_img

SSLC porikka April 6 tarikoni a·bachenggen ine jangbingbangania kakket ong·ja: MBOSE

Must read

Shillong, Jan 18: Meghalaya a·doko Secondary School Leaving Certificate (SSLC) porikkako re·baenggipa April 6 tarikoni a·bachenggen ine social media-rango jangbingbanganiko Meghalaya Board of School Education (MBOSE)-ni official-rang jegalatenba, SSLC aro Higher Secondary School Leaving Certificate (HSSLC) porikkarangko ong·atna gita da·o dipet tarikrangko tik ka·a dongkuja ine talatangaha.

“Iandake tol·e jangbingbangatanirangko niksona chinga ka·dongjachim indiba mikkangchi iandakgipa obostarang ong·taijana gita chinga office department-ni gita kamko ka·gen,” ine MBOSE-ni joint director M Marbaniang, Hub News-na parakataha.

Marbaniang-ni parakatani gitade, da·o dipet SSLC aro HSSLC porikkarangko ong·atna tarikrangko tik ka·a dongkuja aro iani bidingo MBOSE-ni official-rang, a·dok sorkari baksa chanchirimangchenggen.

“Porikkarangko basako ong·atode namgen, uko chinga chanchirimangchenggen,” ine MBOSE-ni official parakataha.

Porikkarangko sena sienggipa chatro chatrirangni bidingo janapatengon, SSLC porikkako sak 78,000-80,000-mang aro HSSLC porikkako sak 40,000-42,000-mangni gita candidate-rang senaba gnang ine Marbaniang parakataha.

“Skul aro college-rang, porikka sena sienggipa chatro chatrirangni form-rangko da·oba on·atengkua. Uni gimin porikkarangko badita sak candidate-rang semanchagen da·o dipet chinga tale ma·sikujaenga,” ine MBOSE-ni official aganaha.

Porikkani question paper-rang ‘leak’ ong·jana gita official-rang, rakgipa ja·kurangko de·e kamko ka·gen ineba Marbaniang ku·rachakaniko on·angaha.

Sabisi giproroengmiting somoio porikkarangko ong·atna nangengani gimin janapatengon, porikkarangko ong·atani somoio Health department-ni dongimin niamrangko rake ja·rikchina gita MBOSE dingtangmancha ge·etanirangko on·manaha ine Marbaniang parakataha.

Class X aro class XII-ni chatro chatrirangna pangnan skulrango class-rangko ra·jringenga aro porikkana skangan ia class ge·gnini syllabus-ko somoi gita matchotgen ineba MBOSE-ni official, an·tangni ka·dongchakenganiko parakataha.

Indake ong·engon, porikkarangko ong·atani bidingo social media-rango tol·e jangbingbangatanirangchi chatro chatrirangko jajaatjachina gitaba ua manderangko didiataha.

spot_img

More articles

spot_img
-->

Latest article