Gangtok, March 13: Biaprangni nitoaniko nina gita re·angmiting somoio Sikkim a·doko tanggitik suurirang ga·akani a·sel rama tong·sao jachange donggipa sak 400 mang tourist-rangko Army-rang naljokatan baksa uamangna simsak-nirokaniko aro cha·ani-ringanirangko on·e dakchakangaha ine chelchakgipa doloni mija Robibar salo koborna parakataha.
Chelchakgipa dolni ku·wattimgipa Lt. Col Mahendra Rawat-ni koborna aganatani gita, Sikkim a·doko donggipa Nathu La a·briko aro Tsomgo (Changgu) Lake-ko nienba gari bol 100 mango gae pil·baengmitingo sak 142 me·chikrang baksana sak 50 bi·sarangko man·chape gimik sak 400 mang tourist-rang mija Sonibar salpaksachibara rama tong·sao jachange dongna gita nangtokaha.
Jachange donggipa tourist-rangko naljokatna gita, Trishakti Corps-ni Army sipairang baksana Police aro Civil Administration nangrime gong·raken kamrangko ka·chakataha. Uandake, mija Sonibar waljatchiona kingkingan jachanggipa manderangko naljokataha aro uamangna simsak-nirokanirangko on·an baksa pilakkon naljokgipa biapona rimange sipairang, uamangna waltuchakna gita biaprangkoba tarie on·aha” ine Lt. Col Rawat parakataha.
Robibar pringo, Army-ni General Reserve Engineering Force, suuri ga·akgipa ramarangko tarie on·na man·aha aro chelchakgipa dolrangni rang·san kamko ka·chakatanichi pring 9 bajion Gangtok-ona gari-gorarang mamingba champenga grian re·rurana gita man·aha ineba ua agandapataha.
