Shillong, Jan 12: National Youth Day-ko da•al Mongolbar salni bako Shillong songjinmani Ramakrishna Mission-o maniangaha aro ia salko manianio Meghalaya High Court-ni Justice HS Thangkhiew, chadamberangna aganprakengon, Swami Vivekanda-ni janggi tanganiko daksninge gipinrangna janggi tangchina gita didiangaha.
Ia apsan hall-on Swami Vivekananda, bak gni dake bon•kame aganprakangahani gimin ia National Youth Day-ko ia Ramakrishna Mission Vivekananda Cultural Centre-o maniangaha.
Ia National Youth Day-ko manianio Justice Thangkhiew, chadamberangna agan-ku•pattianirangko on•angengon, dakna man•gen ine chanchie kam ka•giparangsa a•songko rikaniode on•gilpana man•a ine parakangaha.
Ia tom•anio academy-ni founder Raphael Warjri-ba dongpae jinmana aganprakengon, Chicago songjinmao Swami Vivekananda-ni skanggipa changna aganprakaniko aro Shillong songjinmao bon•kamgipa changna skiprakaniko gisik ra•atpilangaha.
Ia National Youth Day-ko maniani gnigipa session-o Meghalaya a•dokni Art & Culture Minister AL Hek, mongsonggipa sokgipa ong•e bakko ra•angskaaha aro 1985 bilsi dipetan Swami Vivekananda-ni atchiani salko National Youth Day dake manirongbaenga ine jinmana talatangaha.
Ia salko manianio dingtangmancha, re•anggipa 2020 bilsini July jao ong•atanggipa dingtang dingtang susaanirango chegiparangna boksisrangkoba on•angjolaha.
