Shillong, Aug 2: Bilsi 1971-o India-Pak dakgrikanio cheani bilsi 50 gapaniko gisik ra·ani bak gita aro Swanim Vijay Varsh-ko maniao Meghalaya a·dokni Governor Pa Satya Pal Malik August 2 tariko Swarnim Vijay Mashaal ba Cheani bilcham-ko Raj Bhavan Shillong-o rimchaksoaha.
So·gimin bilchamko Air Marshal Pa Amit Dev, Governor-ni jako on·aha aro ja·mano Governor uko Assam Rifles-ni Director General Lt. General Pradeep Chandran Nair-ni jako on·skaha.
Tom·anio Pa Malik 1971 bilsio Indo-Pak dakgrikanio ka·donggipa matgrikrangni an·tangtangni janggiko on·kangahanina de·mitele aganaha. Jeni a·selan Bangladesh a·songna jakgitelaniko on·a man·ahachim. Indian Army-rangni ka·dongani da·alo dal·drobaenggipa chadamberangna sakki aro a·songko chel·chakna on·kangani ching·chaoatchina ine Pa Malik aganaha.
Bilcham-ko so·e maniani December 16 2020-o Delhi songjinmaoni a·bachengaha. Indaken Meghalaya·aona July 27 2021-o sokbaaha aro ua August 8 2021-ona kingking donganggen.
