Tokyo, July 30: Tokyo-o ong·atenggipa Olympics-o Assam-ni boxer (su·grikgipa) Lovlina Borgohain, Chinese Taipei-ni Nien Chin-ko 4-1 point-rangchi cheenba da·o semi final-ona doangaha.

Boxing kal·susaani 69 kg category-o Lovlina, Chinese Taipei-ni Nien Chin-ko cheaha aro da·o semi final-ona doange India a·songna medal-ko man·e on·na biapko tarisoaha.

Lovlina-ni cheani ja·man Boxing Federation of India (BFI)-ni gitaba uko social media gita mittelpilataha.

Iana skang, pre-quarter-ko kal·anioba Lovlina Borgohain, Germany a·songni bilsi 35 ong·gipa Nadine Apetz-ko 3-2 point-rangchi cheahachim.

Bilsi 23 ong·kuenggipa Lovlina Borgohain, Olympics-o kal·na gita Assam a·dokoni seokako man·gipa skanggipa me·chik ong·ahachim.

Da·o ua me·chikrangni 69 kg Welterweight category-o susaangskagnok.