Shillong, Oct 10: October 10 tariko, Meghalaya Sorkari a·doko Casino ba joa kal·chakramko a·bachengatna am·engjok ine toromni dilgiparang aro a·dokni manderangni ji·jaani batroroengon, Taxation-ni Minister In charge Pa James Sangma, iani bidingo Department taraken agan chanchigrikaniko dakgen ine ui·ataha.

Kobor ra·timgiparangna Pa James Sangma aganengon, sorkari toromni dilgiparang ong·e jinmani pal ku·rang on·enggipako knachakna nangchongmotenga ine chinga nika maina toromo dilgipa ong·anira jinmarang pal ku·rang on·gipan ong·enga. Unigimin Casino-ko a·bachengatani ba a·bachengatgijani bidingode Department baksa dingchike chanchirimchengani ja·mansa jekoba dakgen ine Taxation Minister aganaha.

Re·anggipa October 7 tariko KJP English Service Church, Kyndailad-o Khasi Jaintia Church Leaders Forum (KJCLF) dingtangmancha bi·rimaniko ong·atani somoio ‘Damsan namgnina bi·na’ ine katta bichongko done bi·grimanioba Meghalaya a·dokko Joa kal·chakram dakaniko ra·galchina aro uno nangchapgipa niam tarianirangkoba bon·atchina ine bi·anirangko nikangaha.