15.3 C
Tura

Tripura-o saksa chadambe BSF-ni jakchi so·ota man·a

Must read

Agartala, Feb 1: Salgro-salaram Tripura a·dokni India aro Bangladesh sima-ari jologipa song damsao saksa bilsi 24-ong·gipa chadambe da·al Sombar salo Border Security Force (BSF) sipairangni jakchi goa man·e siaha ine police koborna u·iataha.

Iani bidingo saksa a·gipi police officialni u·iatani gita, machurangko niam gri badingsrukatenggipa ine potchipeming BSF sipairang an·tangtangko chelchakna gita ra·bitgipa silchidare ba non-lethal weapon-chi uko biapon goeming saksa college-o poraienggipa Jasim Mia minggipa a·damon sikamaha. Aro ia obostara, salgipeng Tripura-ni Belonia sub-division-ni ning·o donggipa Debipur song sambao Sombar pringo ong·aha.

Ia ong·anga obostako BSF officialoni koborna talatani gita, ua mande matsramgipa bostuchi uamangni sipairangko chadrapaha jeni gimino uamang an·tangtangko chelchakani gita uko goaha indiba ia a·sel-obostani chu·gimik koborrangko chinga sengengkua ine agane, a·gipi BSF officialrang a·sel ong·gipa biapona bakan re·angtokaha ine ua taldapataha.

Indake ong·engon, ia ong·a obostani bidingo goako man·gipa mande matchu badingsrukanio maming bak dongja maina Jasim Mia, unomiting noktangoni bang·e chel·gijao a·songgipin baksa sima-ari kachapgipa sambao matchutangkosa nirikengachim ine songni manderang aroba sianggipani ma·drangrang BSF-ko matnange aganaha.

Obosta ong·ani ja·man tapan ua songo jegalanirang aro manderangni gisepo jejrengchipchipanirang ong·kataha, indake Agartala-ni salgipengchipak km 135 mang ong·gipa biapona a·gipi police officialrang baksana sipairang bakan sokangtokaha.

Adita bilsirangoni dipet BSF sipairang, sima-ari jolrango pilak ong·gija kamrangko champengna aro nirokatna gita uamangni jakkalronggipa silchidarerang, rubber-ni gullirang ba chonchongipa gullirang ba plastic-ni gullirangchi gona jakkalgipa silchidareni pal non-lethal weapon-rangko jakkalskaienga.

More articles

-->
-->

Latest article