Washington, Nov 16: United States-ni White House-na gital President-ko seokna gita ia bilsi eleksinko ong·atgipao vote on·anirango bang·en cha·bokanirang gnang aro eleksinni somaio ong·gija dake kal·akanirang dongaha ine maming sakki gri US-ni President Donald Trump-ni a·kanggipana chakpae hajal manderangni jegale re·jomaniko dakangani somaio Washington downtown-ni rama jolrango adita kajia-golmalrang ong·aha.
Mija November 3 tariko eleksinko ong·atanggipao Democratic candidate Joe Biden-ko chegipa ine parakatani ja·man Million MAGA March ba bang·a manderangni jegale re·jomaniko ong·atanio mija Sonibar salgimikan maming golmal gri tom·tome matchotahachim, indiba walni somaiosa Trump-na chakgiparang aro Biden-na chakgiparangni gisepo kajia-golmalrang ong·na gita a·bachengaha.
Trump-na chakgipa aro Biden-na chakgipa dolgnini gisepo, unwalo White House-oni adita block ge·bongamang chel·ao mande jinma halla ong·pile kajia ong·gitikaha. Uamang dolgnini gisepo go·olrangchi dokgrikaha, jitpakgrikaha jeni ja·manosa police-rang re·bae uko namatena man·aha, ine koboro parakataha.
US-ni dingtang dingtang biaprangoni manderang ua somaio Washington DC-chipakna chimongbatokaha, indake Make America Great Again (MAGA) Rally-o bakko ra·giparang eleksino Trump-an cheaha aro ia songjinmao uamangni dilgipana chakpaaniko mesokna gita tom·baaha ine agantokaha.
Trump, jean chegniko agansoa man·gipa Biden-ni ia eleksino cheaniko ra·chakna man·kujaiengachim, maming sakkirang grian eleksino mongsong susagrikani biaprangonikon, cha·bokanichi aro ong·gija dake kal·akanichi million vote-rangko man·gniko ua gimaatna nangaha ine changni-changan a·kangaha.
Fox News-o janapani gitade, Trump-ni kosako chakate jingjengatgiparang Trump-na chakgiparangko do·chirangchi godablekaha, chin taribagiminrangko, tupirangko aro namnikgija segipa lekka pal·takrangko cha·ueming uarangko wa·alo so·tokaha.
Trump-na chakgiparangni dongenggipa hotel-chipakna mikkange re·angna jotton ka·miting somaio downtown DC-o Trump-ni kosako jingjengatgiparang, niamni obostarangko nirokgiparang baksaba adita nanggrikaha, ine CNN-o parakataha.
Unomitingo, mija Sonibar attamchibara, Trump-ni tweet ka·atgipao MAGA rally-o bakko ra·giparangni noksarangko mesokatjole una chakpae bang·a manderangni tom·dakanirangko koborko wattimenggipa channel-rango mesokatjaha ine matnangnaha.
Ia obostani bidingo komibeoba sak 20 manderangko rim·aha ine mija Sonibar walo Washington DC Metropolitan Police Department-oni u·iataha.
