Shillong, Sep 15: Tura medical college-ko rikani da·o 33 percent matchotaha aro iano koros ong·ani 17 percent ong·engaha ine Bristibar salo, a·dokni Health Minister James K Sangma, Assembly-na parakataha.
Tura medical college-ko 2021 bilsini January 27 tarikon matchotatna gita nisanko donahachim indiba COVID sajinma baksana dingtang dingtang a·selrangchi college-ko rikanio ja·manchakatako man·aha ineba ua parakataha.
Ia medical college-ko rikenggipa company, somoiko bi·dapahani gimin sorkari, ia college-ko matchotna gita 2023 bilsini February 7 tarikona somoiko on·dapaha ineba James parakataha.
Tura medical college-na korosko gong crore 243.82 hisape donsoahachim aro ianoni gong crore 172-kode India sorkarioni on·na siengachim.
Da·o dipet Tura medical college-ko rikanio gong crore 41 koros ong·ahani gimin ian chu·gimik korosoni 17 percent gapengaha ine Health Minister parakataha.
Shillong medical college-ni bidingo Nongkrem MLA Lambor Malngiang-ni sing·anina aganchakaniko on·angskaengon, Shillong medical college-ko rikna gita gitcham MoU-ko den·galpilani ja·man da·o PPP mode-na gital dolrangko sorkari okamengaha ine James parakataha.
Shillong medical college-ko New Shillong Towship-o rikna gita sorkari, acre 50 a·arangko on·manaha ineba ua parakataha.
