Shillong, Sep 15: Ampati-Zikzak-Mahendraganj aro Purakhasia gita Garobadha-oni Dalu-ona dakanggipa ramako tarina a·dok sorkari gong crore 4.42 tangkarangko chamataha aro ia apsan ramakon National Highway dake tarina gita ma·mong sorkarina proposal-ko on·na sienga.
Bristibar salo, a·dokni Deputy Chief Minister aro PWD (Roads) Minister Prestone Tynsong-ni Assembly-na parakatani gitade, ia ramako tarina a·dok sorkari, gong crore 4.42 tangkarangko chame donmanaha aro gong crore 5.29 tangkarangko chamdapna miksongenga.
Salmanpara-ni MLA Winnerson D Sangma-ni sing·anina aganchakaniko on·angengon, ia ramara a·kawe jolo mongsongbatgipa ramarangoni dilsa ong·engani gimin ia ramako national highway dake tarina gita ma·mong sorkarina proposal-ko on·na miksongenga ine Tynsong parakataha.
Tynsong-ni parakatani gitade, ia kilometre 98 ong·gipa ramako 2018 bilsio gong crore 250 koros ong·e matchotataha aro ia ramako nirokna gita contractor baksa songgigrikani 2019 bilsion bon·ahachim.
Ia rama gita Bangladesh a·songona ro·ong salgipa truck garirang re·ruraengani a·selsa ia rama nosto ong·batenga aro ramani bang·bata bakrangon jakasichipaknisa nosto ong·bataha ineba PWD (Roads) Minister parakataha.
Ia rama gita nangana bate bostu salgipa truck garirangni re·ruraengani gimin Rangsakona-ni MLA Zenith Sangma janapatskaengon, ia rama gita bostu salgipa truck garirangko metric ton 12-na bate salna on·jagenchimoba truck garirang, metric 42-48-na batpilerang salskaenga ine parakataha.
Ia rama gita truck garirang skatang salruraengani a·sel bang·en janggirang gimana gita nangaha ine janapatengon, iandake truck garirangni simsakgija skatang salaniko champengna rakgipa niamrangko donatchina gita Zenith Sangma, sorkariko didiangaha.
Iana aganchakaniko on·angskaengon, bosturangko salna gita truck garirangna dongimin dingtang dingtang niamrang donga ine PWD (Roads) Minister, talataniko on·angenba, ia ramani nosto ong·ani a·selko am·sandina git aua technical dolna ge·etaniko on·gen ine ku·rachakaniko on·angaha.
Ramao naljokanirangko on·na gita sorkari, rakbatgipa niamrangko ra·gate on·anggen ineba Tynsong parakataha.
