Tura, Jun 19: Garo Hills-o songdongenggipa manderangni nangnikenggipa Additional Secretariat Complex-ko rikna gita Bristibar salo, Meghalaya a•dokni Chief Minister Conrad K Sangma, pangchakaniko Tura-ni Dakkopgre-o songe on•angaha aro ia pangchakaniko songanio, Meghalaya Assembly-ni Speaker Thomas A Sangma, Deputy Speaker Timothy D Shira, Deputy Chief Minister Sniawbhalang Dhar, Power Minister AT Mondal, Health Minister Ampareen Lyngdoh, PHE Minister Marcuise N Marak, Sports Minister Shakliar Warjri, Education Minister Rakkam A Sangma, Tourism Minister Paul Lyngdoh, Fisheries Minister AL Hek, Cooperation Minister Comingone Ymbon, MLA-rang, official-rang aro dingtang dingtang dolrangba dongpae bak ra•angtokaha.
Ia Additional Secretariat Complex-ko Tura-o rikna gita gong crore 156 tangkarangko sorkari chamataha.
Additional Secretariat-ko Tura-o rikna pangchakaniko songaniara a•dokna, mongsongbate Garo Hills-ni manderangna gisik ra•beani sal ong•gen ine janapatengon, ia Additional Secretariat Complex-ko rikaniara building complex-kosan rikenga ong•ja indiba manderangni nangnikaniko chu•sokatanisa ong•enga ine Chief Minister parakataha.
Sorkarini dingtang dingtang kamrangko ra•anio Garo Hills-ni manderang neng•nikanirangko chagrongna nangengani gimin ia additional secretariat-ko kulianichi a•dok sorkari, Garo Hills-ni manderangna nambate dangdike on•na man•gnok ineba Chief Minister aganaha.
Shillong-o rikenggipa gong crore 1800-ni gital Secretariat-ni bidingo talataniko on•angengon, mikkang bilsi 100-ni gimin chanchisoesa ia sorkari, kamrangko ka•enga aro ia nokrangko rikanichi sorkarini kamrangko manderangona sepangbatasan ong•aigija kamrangkoba altubatatgnok ine Sangma aganaha.
Chief Minister-ni aganani gitade, Garo Hills-o rama jal•langrang namjani gimin aro pilakni gitan namroro silroroani dongsrangjani gimin bang•a manderangan suk ong•gijaniko paraktokengachim indiba da•alo MDA sorkari, Meghalaya a•dokko a•songo nambatsranggipa a•dokrangoni damsa ong•atna niksamsoani gnang kamrangko ka•engaha.
Ia sorkari, a•dokni pilak district aro block-rangon gital office-rangko rikna tangka paisarangko chamataha aro da•alo block office, police station aro pilakon dingtanganiko nikna man•engaha ineba ua aganaha.
Jowai aro Pynursla-o rikenggipa Mini Secretariat-ni giminba ia tom•anio Chief Minister, jinmana talate on•angaha.
Ia Additional Secretariat complex damgittam donggen aro Chief Minister-ni complex-kode 2027 bilsini January jaon matchotna ka•dongenga ineba Sangma aganaha.
Sorkarini niksamsoani aro kamrango bakrimaniko on•engani gimin ia cholko ra•e a•dokni Chief Minister, unbaksa kam ka•rimgipa Cabinet minister-rangko aro dingtang dingtang political dolrangkoba mittelpilangaha.
Tura jillani ramarango apchangket ong•aniko komiatna gita gong crore 900 koros ong•e rikna sienggipa Tura Bypass-ni giminba ia tom•anio Chief Minister parakataha.
Tura-o rikenggipa Additional Secretariat-o Chief Minister-na, Cabinet Minister-rangna, Chief Secretary-na aro gipin dal•dalgipa officer-rangnaba kuturirang donggen. Ia complex-o dingtang dingtang sorkari department-rangnaba biap donggen.
Na·simang ia video-koba nina man·gen:
Na·simang iakoba poraina man·gen: Skul bi·sarangko gate chobatanggipa ring Brahmaputra chibimao bikpila
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
