New York, Nov 6: Koborrangko man·soani gita, ia chango US president-na eleksinko ong·atenggipao Democratic candidate ong·e susaenggipa Joe Biden, US-ni ma·ambio batanggimin changrango eleksino susagiparangna bate bang·bata vote-rangko cheeming President gitcham Barack Obama-ko ga·changbate segatgiminko pe·aha.

Ia November 4 tarikona, Biden, gimik-gimang 70.7 million vote-rangko man·aha, jean iana skangrango president-na susagiparangnade bataiaha ine koborko man·soaha. Vote-rangko chananio, iana skang batanggimin 2008 bilsio Obama-ni segatgipana 300,000 bate vote man·anirangko man·chapa. Bilsi 2008 jolo President gitcham Obama-ni gimik 69,498,516 vote-rangko man·e segatanggipako ianpako ga·changbataha.

President Donald Trump baksa ianpako White House-na electoral vote-rangchi bil·ting-bil·ting susagrikanio Biden, susarimgipa Republican candidate-na 2.7 million vote-rangchi namen skangenga aro chananirang ong·kuengon uni vote-rangba tang·dorikrikaienga.

Mni Butbar salona, Trump-ba gimik 67.32 million vote-ranagchi Obama-ni segatanggipa samba-samba dakengaha. Gimik 100 million vote-rangko early voting aro mail-in ballot-rangoniko man·soahanio, komibeoba da·o 23 million vote-rangko changni dongkuenga, jechin Biden-ni vote-rangko tang·doatangani cholrang dongkuenga ine koborrangko man·soaha.

Iarangni gisepon, Michigan aro Georgia-rango vote-rangko chananio cha·bokanirang gnang ingipao nangchape Trump-ni matnange sedoaniko US court-rang ra·chakna jechakaha. Knaani gitade, Michigan-oniko absentee ballot-rangko chanjachina sedoangaha, indake, Georgia-o ong·gija ballot-rangkoba chanchapaha ine matnange sedoangskaahachim. Uasan ong·aijaha, Pennsylvania aro Nevada-ni kosakoba sedoaha aro Wisconsin-oniko vote-rangko chanpiltaichinaba dabiaha.