Williamnagar, Nov 10:Williamnagar District Sports Association (WDSA)ni ong·atgipa MLA Football Trophy 2021-na robol ga·tingsusaani final-ko Nengkra Champion aro Rongbinggre Champion-ni gisepgriko Butbar salo ga·subee kal·susaangachi matchotataha.
Final-ko kal⋅ani salo North Tura-ni MLA aro sorkarini adviser Pa Thomas A. Sangma mongsonggipa sokgipa ong⋅aha jeon Gambegre Constituency-ni MLA aro MTDC-ni Chairman Pa Saleng A Sangma aro Williamnagar-ni MLA aro sorkarini Chief Whip Pa Marcuise N Marak-maangba mande ra·ako man⋅na kragipa sokgiparang ong⋅e bakko ra·angaha.
Uamangna agreba, NPP-ni State Youth Working President Dabo Mrong, NPP-ni gipin dilgiparang, Samanda Block-ni BDO Pa Albert G Momin, District Sports Officer Ma Babira G.
Momin, Ferando School-ni Principal aro dingtang dingtang gadango sorkarini kamko ka⋅enggiparang aro joloni bang⋅a manderang final-ko kal·suaaniona sokbatokaha.
Kal·aniko a·bachengna skang, Williamnagar District Sports Association-ni padot Pa Joyson K Marak-chi rimchaksoani kattarangko aganaha.
Kal·aniko an·saodapatna nitobegipa ganding-chindingrangko gane Ferando Memorial Secondary School-ni chatro-chatrirang uamangni changa-sapaniko doka-damachi mesokangaha.
Ia MLA Football Trophy-ko ong⋅atna mongsong dakchakgipa Pa Marcuise N Marak-ni jinmana aganprakangengon, ia kal·susaaniko ong·atanian East Garo Hills jolni chadamberangko robol kal⋅anio namdapatna aro uamangko nambata gadongona sokdoatna miksongani ong·a ine parakataha.
Gipin sokbagipa Pa Saleng A Sangma, chadamberangko kal·susaani a·bao namdapatna jotton ka·engani gimin Pa Marcuise-ko dingtangmancha mittelpilange, Meghalaya a⋅doko tom⋅tomani aro manderangna dingtang dingtang cholrangko on⋅anina MDA sorkarikoba mittelangjolaha.
Salni bako mongsonggipa ong·e sokgipa Pa Thomas A Sangma, Ferando Memorial School-ni Band Party-rangko nike an⋅tangni ku⋅si ong⋅aniko parakangenba A·chik a·songni gipin biaprango iandake school-rango band party dongako nikkuja ine jinmao agananga baksa final kal·nagipa dolgnina nama-sikaniko on⋅angaha.
Indake ong·engon, final-ko kal⋅ani skanggipa bako darang dolba chipgrikjae biltinggrik ong⋅aha indiba neng·takani minitsa ja·man Rongbinggre-ni Liason Sangma, Nengkra Champion-ko golsa chipaha. Iani ja·man dolgnian rakbeen jotton ka⋅angkuoba kal⋅a matchotaona kingkingan gol chiptaina man⋅chipjaha.
Kal·anio Rongbinggre song, golsachi dolgipinni kosako chegipa ong·e tangka hajal 50,000 aro trophy-ko Pa Thomas Sangma aro Pa Marcuise Marak-ni jakoniko ra⋅chakangaha. Indake, Runners Up-ni boksis tangka hajal 30,000 aro trophy-ko Nengkra Champion-na Pa Saleng Sangma-ni jakchi on⋅angskaaha.
Kal·a gimiko nambatgipa goalkeeper-ko Rongbinggre Champion-ni Lakingbirth man⋅angaha, gol bang·bate chipgipani boksisko Nengkra Champion-ni Akim Sangma man⋅angaha aro Player of the Tournament-ko Rongbinggre Champion-ni Bipiush Marak man·angskaaha.
Unomitingo, taekwondo, chrokani aro band party-rangni dakmesokanirangchi manderang namen an·saodapataniko man⋅aha.
