Guwahati, Sept 22: Butbar salo World Rhino Day-ko gisik ra·e maniani bak gita Upper Assam, Golaghat district-ni Bokakhat songo jinma manianganio Hindu toromni dakbewal-rikbewalko ja·rike a·dok gimikni treasury-rango chimonggipa ge 2,400 gondu grongrangko so·dame galaha. Iandake so·e galanio ian Asia gimiko dal·batsranggipa ong·enga.
Ong·telaigipa obostachi aro a·selrangchi sianggipa gondurangoniko chimonggipa ba sikar ka·giparangoniko sekrikgipa grong ge·sasan dongaigipa Assam a·dokni gimik-gimang ge 2,623 gondu grongrangko a·dokni dingtang dingtang treasury-rangoniko man·ahachim.
“Chimonge man·gipa gimikoniko ge 2,479 gondu grongrangkode so·gen indiba ge 94 dingtangmanchagipa grongrangko sandie nianiko dakangkuanina ripinge rakkigen aro mamlarang kachario matchotkugijagipa bangki ge 50-kode donenga,” ine tom·ao dongpagipa Assam-ni forest minister Butbar salo aganangaha.
Unomiting jinmana aganprakanganio, tangenggipa gonduni grongkosan Assam a·doko gamchatnike ra·a ine ia chimonggimin gondu grongrangko so·anichi a·gilsakna dal·begipa dakmesokani gita chacha ong·gen ine Assam-ni skotong minister Pa Himanta Biswa Sarma parakataha.
“A·dokni treasury office-rango ia grongrangko rakkie donangkuaiode an·ching maiba gamchatbeako ripinge dona gita chacha ong·enga, uni gimin iako so·e galanichi tangenggipa gonduni skoo gnanggipa grongrangsan mangmang a·chingni a·doknade gamchatgipa ong·aia ine manderangna ma·siate on·na angni nangnikaniba ong·a.Gondu siahaode uni grongrang an·chingna gamchatgipa ong·jaha,” ine tom·ao mongsonggipa sokgipa ong·e bakko ra·anggipa Pa Sarma aganprakangaha.
Ia chimonggimin grongrangoni bang·batan kg 1.5 mangna batgipa gimik ge 94 gondu grongrang baksana Guwahati treasury-oniko man·gipa aro 1961 bilsioni ripinge donenggipa a·gilsak gimiko gnigipa ro·batsranggipa cm 51.5 mang ro·gipa, kg 2.5 ong·gipa grong aro Kaziranga-ni Bagori Range-oniko 1982 bilsi jolo man·ako Bokakhat treasury-o donenggipa a·gilsak gimiko jimbatgipa kg 3.05 mang ong·pilgipa aro cm 36 mang ro·gipa gondu grongko man·chapa.
