Baghmara, Dec 14: Border Security Force-ni (BSF) 200 Battalion uni Civic Action Programme-ni ning•o, chadamberangko kal•susaanirangna gisik nangatna aro manderangni bakrimaniko bilakbatatna ine salgittamna, chong•motan December 12-14, 2025-ona cricket tournament-ko ong•atangaha. Ia tournament-ko December 12 tariko Shillong-ni BSF Sector Headquarters-ni DIG, S. Ganesh oprake on•angaha.
Ia tournament-o dol 8 kal•susagiparang gisik nange bak ra•angaha, uarangara—SP XI, DC XI, 200 Bn BSF, Tinku XI, South Master, Lot Nagar Baghmara, Bolsal XI, aro Government Higher Secondary School ong•a. Ia kal•susaanirangko nina bang•a manderangan re•baaha aro salgittamna kal•susaanirangko ong•atanio sak 200mang manderang re•bae nieaha.
Kal•susaanirangko ong•atangenba SP XI, DC XI, 200 Bn BSF, aro Bolsal XI semi-finalrangona doangaha. Semi-finalrangko susaanio, DC XI SP XI-ko amaha aro Bolsal XI, 200 Bn BSF-ko ame final-ona doangaha.
Uandake final-ko DC XI aro Bolsal XI-ni gisepo susaangaha aro Bolsal XI Cricket Club namedake kal•susae chegipa ong•angaha.
Boksisrangko sualanirangko senior BSF officer-rangni mikkango dakangaha. 200 Bn BSF-ni Commandant Vinod Yadav, Deputy Commandant H. Rojen Singh, aro Assistant Commandant Manish Prasad bak ra•gipa dolrangna trophy-rang aro cricket kit-rangko sualatangaha.
South Garo Hills-ni Superintendent of Police Shailendra Bamania, aro South Garo Hills-ni Deputy Commissioner Sumit Kumar Singh ia tournament-o gisik nange bak ra•enba an•tangtangni dolrangko namedake kal•susaangdilaha.
Baghmara jolo donggipa manderang ia kal•susaaniko ong•atanina aro chadamberangni namedake dal•roroanina aro songni-nokni manderang baksa nangrimaniko ra•bana ja•ku de•anina BSF dolrangko mitelangaha.
Ia manianiko ong•atanichi BSF-ni jolni manderang baksa meli-nangrimna krenge kam ka•anirangko changsatai mesoka. Iana skangrangba uamang volleyball aro football tournament-rangko ong•atangaha.
Na·simang iakoba nina man·gen:
Na·simang iakoba poraina man·gen: Assam-ni cha bagano kam ka·giparangna a·a pattarangko on·gnok
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
