Delhi, Nov 18: Meghalayani Skotong Minister Pa. Conrad K. Sangma a·songni skotong songjinma New Delhiona doange dingtang dingtang namdapani programme rangko a·doko kam ka·engani bidingo golporimna adita sak ma·mongni Minister rangko grongangaha.
Ma·mongni DoNER Minister Dr. Jitendra Singh ko gronganio Pa. Sangma Shillongo rikenggipa International Centre for Performing Arts & Culture nokko matchotatna nangdapenggipa tangka rangko janapaha.
Gronge golporimanirango chu·sokanirangko Pa. Sangma an·tangni tweetero segatataha.
Matchotsrangkugija gipa Mawshynrut – Hahim rama aro Borkhat – Sonapur ramako Northeast Road Sector Development Scheme (NERSDS) ni gita tangka paisa rangko chame matchotatchina gitaba DoNER Ministry-ko mol·molaha ineba uni tweetero segatataha
Da·al attamchipak ma·mongni Finance Minister Ma. Nirmala Sitaramanko gronganio Skotong Minister a·paloni dakchakenggipa projectrang jeonin World Bank ba dakchakenggipa dolsa ong·engachim uarangko nipile kam rangko ta·rakatchina mol·molaha. A·dokni an·sengbaljokani aro tourism a·ba ko bilakdapatna a·palonigipa World Bank dakchakaniko on·enga.
Ma·mongna kajina gamgiminoniko a·dokna watatpilanio dakchakchina ,namdapatgimin niamrangko ja·rikna rake somoi donaniko adita olgrokatchina aro altuae 1 percentko ra·chakna on·chinaba Ma. Sitaraman ko mol·molaha ineba Skotong Minister an·tangni tweetero janapaha.
Mijalo ma·mongni Jal Shakti Ministerko gronganio Pa. Sangma maidakode komia koroso gitalgipa aro nambatgipa technology ko jakkale a·dokni chibimarangko tangchaatpilna man·gen una golrimangskaaha.
