Tura, Jan 31: Da·al Sonibar salni bako ma·sina man·gijagipa mande saksani manggisiko South West Garo Hills a·jani Ampati jolo donggipa Junjina chiringoniko police-rang man·aha.

Koborko on·ani gitade, ia manggisiko Khambakpara songni manderangsa nikchengaha aro ja·mano songni nokmasa iani bidingo police-rangna u·iatskaaha.

“Junjona chiringo sogimin mande saksani manggisi balboe dongenga ine Khambakpara songni Nokma Rakseng A Sangma chingna u·iataha aro bakan Ampati-ni magistrate baksana health officer aro chingni sipairang ua biapona re·angaha. Manggisiko chioniko ra·ongkatani ja·mano magistrate-ni gita nanga kamrangko ka·e ja·mano ua biapon ia manggisiko rate niaha,” ine South West Garo Hills a·jani Superintendent of Police (SP) R Ravi parakataha.

Indake ong·engon, ia mandeni bimango maming mata bu·ani chinrang dongjani gimin ua chio sripe siasakon ine police-rang chanchichipenga.