Guwahati, Sept 22: Robibal salo kobor-na ui·atani gita, gimik gimang sak 83,008 jajaani gnanggipa lekka puon susaanio bak ra·giparangni mamla-rang Foreigners Tribunal in Assam-o bangki dongkuengon, gital sak 86,756 manderangni batanggimin bilsi bongao Lok Sabha-na lekka susaanio bak ra·giparangko gipin a·songoni ine parakataiaha.
Da·o dipet Foreigners Tribunals Assam a·dokosan kam ka·kuaienga ine Union Minister of State for Home Pa Nityanand Rai aganaha.
Assam Sorkarini ui·atani gita jajaani gnanggipa Assam a·doko lekka puon susaanio bak ra·gipa jeni mamlarangan FTs-ni ning·o napachim aro kamrang bangki ong·kuengachim uan sak 83,008 mang ong·enga ine seachi ui·ataha.
Pa Rai-ni aganani gita, a·dok sorkari aro Union Territory-ni administration-rang niamgri napsrukbagiparangko rim·e done uamangni a·songtangona watatpilna kam ka·chakramrangkoba tariaha ine aganaha.
A·dok sorkarini aro Union Territory-rangni niamgri napsrukbagiparangko rim·e dona tarigiminrangni chu·gimikko da·o dipet name nirokani dongkujaenga ineba ua agandapaha.
