Shillong, July 30: Assam aro Mizoram a·dok damgnini simarango tom·tomaniko aro meli-nangrime donganiko rakkiangna man·na gita a·dok damgnini sorkarirangkon nanga gita ja·kurangko de·china North East MP’s Forum (NEMPF) didiangaha.
“Iandakgipa obostarangko chagrongna nangengon, a·dok damgnini simarango tom·tomaniko aro meli nangrime donganiko rakkiangna man·na gita ja·kurangko de·china chinga salgro salaram a·dokrango donggipa MP-rangni pal, a·dok damgnini sorkarirangkon mol·molatenga,” ine Sukrobar salo, NEMPF-ni chairman Kiren Rijiju aro secretary general Vincent H Pala parakataha.
Adita salrangna skang Assam aro Mizoram a·dokni sima jolo so·sojengjeng ong·anganichi salgro salaram jolrango songdongenggipa manderangna dukniko ra·baaha ineba NEMPF parakataha.
“Dolgni dinggrikanichi manderang janggirangko gimaatna aro saknaanirangko man·na nanganiara manderangna duk mikchiniko aro sintena nanganiko ra·baaha aro kalimenggipa nokdangrangnaba chinga chingni kalimpaaniko on·na ska,” ine forum-ni dilgiparang parakataha.
Dinggrikani aro ka·a ding·chaogrikanirangara pangnan gimaanikosa ra·baa ine ma·sie ra·na nangani gimin janapatengon, mikkangchi a·dok damgnini simarango meligrikgijanirangko apsan meli nangrime namatchina gita NEMPF, a·dok damgnikon didiangaha.
“Ia kamko chu·sokgipa ong·atna gitade dolgnionin bakrime kamko ka·na nanggen ine chinga bebera·a aro mikkangchi ia a·dok damgnini gisepo meli nangrimani aro tom·tomani sokbapilna chinga ka·dongenga,” ine NEMPF parakataha.