Shillong, Nov 16: ‘Meghalaya a•dokde mamingkoba on•na aro mamingkoba ra•pilna nangani dongja’ ine Mongolbar salo Congress dolni dilgipa Ampareen Lyngdoh parakatenba, Assam aro Meghalaya a•dokni simarango meligrikgijaniko namatna gita Mongolbar salo chief minister-rangni Langpih-ona re•angani gimin sing•doangaha.
Assam aro Meghalaya a•dokni simarango meligrikgijanirangko ru•uta bilsirangonin namatchipna man•jaengani gimin Mongolbar salo, meligrikna man•jaenggipa biaprangoni Langpih songona, a•dok damgnini chief minister-rang re•ange songni manderang baksa agangrikeahachim.
Indake ong•engon, Assam aro Meghalaya a•dokni chief minister-rang, maina namgija miksonganiosa a•dok damgnini simarango meligrikgijaniko namatna ta•rake ja•ku de•engakon ine Lyngdoh, an•tangni jajrengchakenganiko parakatskaaha.
Congress MLA-ni parakatani gitade, Congress sorkarini somoioba committee-ni dilgiparang, changni chang Langpih aro gipin biaprangona re•ange, ia meligrikgijanirangko namatna jotton ka•ahachim indiba bang•bata kamrangkon namatchipna man•jahachim.
A•dok damgnio songe on•gipa committee-rangan am•sandianirangko matchotkujaengon aro manderangna parakkujaengon, maini gimin a•dok damgnini chief minister-rang Langpih-ona re•angna nangani ong•aha ineba ua sing•doangaha.
CM sakgnini Langpih-ona re•anganiara agre seng•gnangdugaaha ine janapatengon, ian a•dok damgnini gisepo ding•chaogrikaniko ra•baani cholrangsan ong•engani gimin Mongolbar salo CM-rangni tom•aniara maming namgnirangko ra•bana man•jawa ine Congress MLA parakataha.
