Shillong, Nov 16: Meghalaya aro Assam a•dok damgnini simarango meligrikna man•jaenggipa biaprangoni Langpih songona Mongolbar salo, Meghalaya a•dokni Chief Minister Conrad K Sangma aro Assam-ni Chief Minister Himanta Biswa Sarma, apsan re•ange nieaha.
Ia biapko re•ange nieani bidingo Meghalaya a•dokni Chief Minister Conrad K Sangma, talate on•angengon, ian a•dok damgnini gisepo ru•utbea bilsirangna meligrikna man•jaenganiko namatna gita ja•ku de•chakatani ong•enga ine parakataha.
Langpih-ona apsan re•ange songni manderangko grongna tik ka•ahani gimin ua Assam-ni Chief Minister Himanta Biswa Sarma-koba mittelpilangaha.
Sangma-ni aganani gitade, a•dok damgnini simarango adita meligrikna man•gijanirang dongani a•selan batanggimin bilsi 49-na kingking Langpih jolrango songdongenggipa manderang neng•nikanirangko man•e janggi tangna gita nangtokaha aro ia jolrango so•sojengjeng ong•anirangchi bang•a janggirangba gimana gita nangaha.
A•dok damgnini gisepo iandake so•sojengjeng ong•anirangko nikna man•engani giminsa a•dok damgnini chief minister-rangan, ia meligrikgijaniko namatna aro a•dok damgnini gisepo meli-nangrimaniko ra•bapilna cholrangko sandina tik ka•aha ineba Sangma parakataha.
A•dok damgnini simarango meligrikgijaniko namataniara altua kam ong•jawa aro adita somoirangkode nangaigen ine janapatengon, iani giminsa a•dok damgnini chief minister-rang, apsan nangrime kamko ka•na tika ka•aha ineba Sangma aganaha.
Jegaltimgipa (opposition) dolrangko matnange aganangengon, a•dok damgnini simarango meligrikgijanirangko skotong songjinmao donge kam ka•aianichide namatna man•jawa aro ia sorkaride gitcham sorkarirang gita ong•gija, a•dok damgnini gisepo meligrikgijaniko namatna ja•ku de•chakataha ine Meghalaya Chief Minister parakataha.
Iani bidingo Assam a•dokni Chief Minister Himanta Biswa Sarma-ba kobor ra•timgiparangna talataniko on•angengon, a•dok damgnini gisepo meligrikna man•jaenggipa damdok biaprangko a•dok damgnini dilgiparangan nieaha indiba Langpih-ni giminde name am•sandianirangko dakchengna nangengani gimin ia biapkode skanggipa bakni ning•o man•jawa ine parakataha.
Assam aro Meghalaya a•dok damgnini simarango meligrikna man•jaenggipa gimikm dam 12 biaprang gnang aro uarangara, Upper Tarabari, Gizang Reserve Forest, Hahim area, Langpih area, Bordwar area, Nongwah Mawtamur area, Pilangkata Khanapara area, Deshdemoria area, Khanduli area, Umkhyrni Psiar area, Block I aro Block II baksana Ratacherra jolrang ong•achim.
Ia dam 12 biaprangoni damdokko skanggipa bako a•dok damgnian namatchengna kamko a•bachengengahachim.
