Guwahati, April 1: Assam-o Assembly election-ko nichaksoengon, pangna ong·rongbaenga gitan, bang·a candidate-rangni kosakon criminal case-rang donga ine candidate data-ko nianio nikna man·aha.
Association for Democratic Reforms and Assam Election Watch-ni nie niani gitade, ia bilsini election-o chakatenggipa sak 722 candidate-rangoni, sak 102, chong·motan 14% candidate-rangni kosako criminical case-rang donga ine parakataha.
Uamangoni, sak 82, ba 11 cent-ni kosakode namen dal·begipa badi ka·anirang donga, aro mitamrangkode bilsi bonga ba una bate sastirangko man·gipa dosrangko dakanina matnangani gnang ine nikna man·aha.
Indake ong·engon, 2021 bilsina batede ia bilsini election-o ia matnanganirang komibata ine nikna man·gen indiba obostarangde dingtangsrangaha inede ong·kujaenga, maina iano sing·na nanganiara badita sak candidate-rangni kosako matnanganirang gnang ine ong·ja indiba uamangko badia party-rang seoke chakatna on·enga inesa ong·a.
Dingtang dingtang party-rangon, dingtang dingtang dosrangko dakanina matnangako man·gipa candidate-rang election-o chakatna ticket-rangko man·enga.
Mongsonggipa party-rangoniko niatgenchimode, iandakgipa candidate-rangoni 37 percent-de AIUDF-oni, 28 percent Congress-oni aro 9 percent BJP-oni ong·a.
A·dokni party-rangoba apsandakgipa obostarangko nikna man·enga, aro ian party-ni ong·ja indiba a·dokni gisepo ong·enggiparangsa ong·a ine u·i-ma·sigipa manderang talatangaha.
Iarangna agreba, namen namjabegipa obostarangna matnanganirangko man·enggipa candidate-rangba gnang. Data-ko nie nion, sak 8 candidate-rang mande so·otanina badi ka·e matnanganiko man·enga aro sak 9 candidate-rang so·otna jotton ka·anina matnanganiko man·enga. Ian party-rangni candidate-ko baseani bidingo bang·a sing·doanirangko naata.
Iandakgipa matnanganirangko man·gipa candidate-rangko baseani bidingo talatanirangko dakchina Supreme Court-oni ge·etanirangko pil·nipil on·atgenchimoba, dingtang dingtang a·selrang jekai mingsing-minggamani, manderangna dangdike on·ani, aro politics-ni bidingo kam ka·anirangni gimin janape party-rang talatronga.
Uandake da·o a·doko bang·ede dingtanggrikanirangko nikkujaenga. Badiaba constituency-rangode ia obostarangara namen jajrenganiba ong·a.
Komibeoba Assam-ni dam 8 constituency-rang ‘red alert’ category-ni ning·ao ong·a, jeon chakatenggipa sakgittam ba una bata candidate-rangni kosako criminal case-rang donga.
Na·simang iakoba nina man·gen:
Na·simang iakoba poraina man·gen: Drug awareness-ni bak gita robol kal•susaaniko Tura Legends chea
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
