Guwahati, Sept 2: Batanggimin adita salrangni gisepon, Assam a·dokni South Salmara a·jao Brahmaputra chibima dal·bae a·arangko aro bang·bea nok-jamrangko chi man·angaha ine kobor on·aha.
Koborko on·ani gitade, South Salmara a·jani Chatlapur, Baushkata, Goladigi, Matifata aro uandakgipa songrango Brahmaputra chibima dal·bae a·arangko aro nok-jamrangko chi man·angengani a·sel ia songrango donggipa manderang kenchipchipe dongna gita nangtokenga.
“Ia bilsini gisepon komibeoba te 60 nokrangko chi man·angaha aro Brahmaputra chibima dal·baahaon chinga tuna cha·na man·pilgija kenchipchipe dongna nangtokenga. Iandakgipa neng·nikanirangko chinga chagrongna nangengoba da·o dipet darang panchayati membor-rangan chingona re·bae sing·sandia dongkujaenga. Sorkarionikoba chinga maming dakchakanirangko man·jaenga,” ine jolo songdongenggipa manderang parakataha.
Pangna bilsian ia jolrango a·a-nokrangko chi man·angengoba a·a ruronganiko champengna gita da·onan maming ja·ku de·anirang dongkujaenga ineba songni manderang parakataha.
Ia jolrango chi banani a·sel manderang neng·nikanirangko man·na nangengoba jolni MLA aro MP-rang, ia songrangona re·bae dakchake on·anirang dongja aro election-ni somoirangosan ia dilgiparang, vote bi·amna gita ia jolrangona re·barongaia ineba songni manderang parakataha.
