Guwahati, Jan 7: A•song gimikon COVID-19 giprorotaiengahani gimin Assam a•dokoba Sonibar sal dipet gital niamrangko ra•gatangtaiaha.
Assam sorkarioni u•iatani gitade, Assam a•doko walni 10:00 bajioni pring 6:00 bajiona walantian night curfew-ko ra•gatengahani gimin bading chiwalram, kam ka•chakgipa biaprang aro pilak office-rangkoba walni 9:00 bajion chiptokna nanggnok.
Apsan daken, galamal, bite, me•su, dud, matburingrangni jeng, cha•ani bosturang aro uandakgipa dokkanrangkoba walni 9:00 bajion chiptokna nanggnok.
Restaurant, dhaba aro uandakgipa cha•chakani dokkanrango 50 percent-na batgija walni 9:00 bajionasan kulina man•aigen indiba cha•anirang ringanirangko ra•e re•anggiparangnade iandakgipa dokkanrangko walni 10:00 bajiona kuliskana man•gen.
Sorkari office-rango kam ka•enggiparang pilakan chu•gimik tikarangko su•esa office-rangchi re•na man•gen aro jemangan tikarangko su•e ra•kujaengachim, uandakgipa manderangkode office-rangchi napna on•jawa aro chutti ra•giparangnaba dormaharangko on•jawa ine Assam sorkari u•iataha.
Auto rickshaw, cycle rickshaw aro taxi-rangode biap dongani krian manderangko gatna man•aigen indiba gario re•enggiparang COVID-ni niamrangko ja•rikskana nanggen.
Motorcycle-rangoba tikarangko chu•gimik su•mangiminrangde ki•sangoba gadona man•aigen indiba mask-rangko gantokna nanggen.
Hall ba auditorium-rango tom•anirangko ong•atengon, biap dongaoni 50 percent tom•na man•gen indiba sak 200-na batna man•jawa.
Bia ka•anirangoba tika su•gimin manderang sak 200 tom•na man•gen indiba mande sianirangode sak 100-na baten tom•na man•skajawa.
Cinema hall aro uandakgipa jawilwat mesokram biaprangoba seat dongaoni 50 percent napna man•gen indiba COVID-ni niamrangko ja•rikna nanggen.
Assam a•dok ning•o donggipa pilak skul, college aro university-rangoba online gita class-rangko ra•china sorkari u•iattaiaha.
Pilak skulrangon class 5-ona kingkingde Sonibar saloni January 30 tarikona kingking chutti ong•taignok indiba class 9-oni class 11-ona kingkingde antio changgittam dake class-rangko ra•skagen.
