Shillong, Sept 28: A•songna dangdike on•anio ka•dongbee kamrangko ka•ahani gimin Mongolbar salo, Shillong songjinmani Raj Bhavan-o Investiture Ceremony-ko ong•atanio Assam Rifles-ni sak 44 sipairangna Meghalaya a•dokni Governor Satya Pal Malik-ni jakchi, Gold aro Silver medal-rangko on•angaha. Ia Investiture Ceremony-ko ong•atanio dingtang dingtang sipai dolni dal•dalgipa official-rang bakko ra•angaha.
Ia Governor-ni Gold aro Silver Medal-ni award-ko 1957 bilsio a•bachengatahachim aro ia medal-rangko Assam Rifles-ni sipairangna, uamangni ka•dongbee a•songko warachakanina on•angaha.
Ia medal-rangko on•ani somoio a•dokni Governor, jinmana aganprakangengon, batanggimin 186 bilsina salgro salaramni ga•nangjabegipa biaprango an•tangtangko on•kange a•songko warachakahani gimin Assam Rifles-ko mittelpilangaha.
A•songna dangdike on•anganio an•tangtangni janggirangko gimaatna nanggipa Assam Rifles dolni sipairangkoba ia salo a•dokni Governor, gisik ra•e mande ra•pilskaaniko on•angaha aro mikkangchiba apsan daken kamrangko ka•angkuchina gita sipairangko didiangaha. Ia Investiture Ceremony-ko ong•atanio jinma apsan asonge agan-chanchirimanirangkoba dakangaha.
