Shillong, Sept 14: Assembly-ni agan-chalaitimgipa Pa Metbah Lyngdoh-ko ra·galani bidingo bil tosusaaniko dakna chanchie ra·bagiminko Congress dol Mongolbar salo ra·pilaha.
“Assembly-ni agan-chalaitimgipako ra·galna bil tosusaaniko dakna gita chingni tik ka·aniko on·angachi mangmangba chingni mongsonggipa mangsonganirang chu·ongaiahani gimin Congress Legislature Party (CLP) iako ning·tue chanchiangenba ia chingni tik ka·bagiminko House-ona ra·bae chanchidapaniko nangnike nikjaha,” ine warachakgipa Congress dolni dilgipa Dr. Mukul Sangma Mongolbar salo kobor ra·timgiparangna agan-talataha.
Procedure and Conduct of Business-ni kragipa niamrango pangchake agan-chalaitimgipako ra·galanio bil tosusaaniko dakna chingni tik ka·giminko ua salo on·angggipako chingni ra·pilengahaniko Assembly Secretariat-naba u·iatmanaha ineba Pa Sangma u·iatangaha.
Agan-chalaitimgipako ra·galna gita chanchirime tik ka·bagimino Congress MLA-rang – Pa Zenith Sangma, Pa HM Shangpliang, Pa George B Lyngdoh aro Pa Kimfa S Marbaniang – iamang sakbrian soi ka·angtokaha jekon Meghalaya Legislative Assembly-ni Commissioner & Secretary-na mija September 2 tariko on·angahachim.
Ra·pilani gimin sing·on, jensomoio Speaker-ni office-ko saoba jako ra·e kamko ka·engon ua mandeni kakketgipa democracy-ni chu·gimik bewalko dakmesokaniko man·na gita chinga pangnan ka·dongmana, uni gimin iako u·iatna gitasan chingni miksongani ong·a ine Pa Sangma aganchakaha.
“Uko ra·galani bidingo chanchie tik ka·bagiminko jensomoio House-o jera-ra·grikahaon dingtang dingtang ong·ani aro minggipinrango dal·angna gita man·aia jekon chinga nangnikja, uni giminsa ia mangsonganiko tabilona ra·angachi mangmangba chingni chanchiako parakaha aro chingni miksonganikoba chu·ongnikataha,” ine warachakgipa dolni dilgipa agandapataha.
