Shillong, Sept 14: Khadi Plaza/Market Complex-ko rikna gita Mongolbar salo, Meghalaya a·dokni Chief Minister Conrad K Sangma, pangchakaniko Shillong songjinmani Barik-o songe on·angaha aro iana pangchakaniko songe on·anganio Meghalaya Khadi & Village Industries Board (MKVIB)-ni Chairman, Gavin Mylliem-ba dongpae bak ra·angaha.

Khadi Plaza/Market Complex-ko rikna gita pangchakaniko songe on·angani somoio a·dokni Chief Minister jinmana aganprakangengon, a·doko chona rema bading chiwalanirangko dake cha·enggipa manderangko tang·doatna aro uamangni bading chiwalanirango man·dapanirangko ra·bana gita sorkari pangnan jotton ka·enga ine parakangaha.“A·doko bading chiwalchakram aro kam ka·chakgipa biaprang chu·onga gita dongjani a·selan bading chiwalgiparang aro jakni kamko ka·gipa manderang, an·tangtangni changa sapanirangko chu·sokaniona ra·bana man·jaengani gimin iandakgipa biapko rike on·aniara jakni kamko ka·gipa manderang aro bading chiwalgiparangko tang·doatna dakchakanisan ong·aigija gipin biaprangoni a·dokona re·baenggipa manderangna, jolo man·gipa ma·manti bosturangko brena dakchakani ong·gen,” ine Sangma aganaha.

Ia Khadi Plaza-ko rikanio joltangni manderangan a·doktango man·gipa bosturangko jakkale rikanichi ia nokan a·doko man·gipa bosturangko aro manderangni changa sapanirangko mesokani ong·gen ineba Chief Minister aganaha.

Iana skang, MKVIB-ni Chairman Gavin Mylliem-ba jinmana aganprakangengon, ia Khadi market complex-ko rikani matchotahaon ian MKVIB-na kajinarangko man·dapna dakchakani ong·gnok aro ia project-ara NEC, DCIC, MIDC aro MKVIB-ni nangrime kamko ka·ahani a·selsa da·o be·en pil·na man·engaha ine parakangaha.

Ia Khadi Plaza-ko rikna gita NEC, gong 2,73,76,685 tangkarangko dakchakenga aro ia nokko rikna gita MIDC Ltd, kamrangko nirokskaenga.