Guwahati, Nov 17: Mandeni kosako ong•gija kamrangko ka•aha ine matnangenba, Bangladesh a•songni gitcham Prime Minister Sheikh Hasina-ko pasi on•china gita Bangladesh a•songni International Crimes Tribunal, rai on•angaha.
Apsan daken, Bangladesh a•songni gitcham home minister Asaduzzaman Khan Kamal-koba mandeni kosako ong•gija kamko ka•aha ine matnangenba, siani sastiko on•china Tribunal rai on•angaha.
Re•anggipa bilsio chatro chatrirangni dilanichi Bangladesh a•songo so•sojengjeng ong•anina a•songni gitcham Prime Minister Sheikh Hasina, manderangni kosako rakgipa sastirangko on•china ge•etaha ine International Crimes Tribunal nikani ja•man, ia dilgiparangna siani sastiko on•china gita rai on•angaha.
Sheikh Hasina baksana gitcham home minister Asaduzzaman Khan Kamal aro police-rangni gitcham dilgipa Chowdhury Abdullah Al-Mamun-naba Tribunal, siani sastiko on•china rai on•angaha.
Sheikh Hasina-ni Awami League party-ko election-o susaaonikoba champengataha aro Sombar salo International Crimes Tribunal-ni rai on•aniara, election-na skang so•sojengjeng ong•aniko ra•bapilnaba gnang ine kenchaksoenga.
Sheikh Hasina aro gitcham home minister Kamal-de Bangladesh a•songko wate katahani gimin uamang grian kachario bichal ka•aha indiba Mamun-kode mikkangparaon bichal ka•e, siani sastiko on•china rai on•ataha.
Sheikh Hasina-ni kosako bichal ka•on, uni sorkari, chatro chatrirangni dabianirangko knachakani pal batesa, chatro chatrirangko kragija kattarangchi matnange, chatro chatrirangni kosako rakgipa ja•kurangko de•china ge•etaniko on•skaaha ine Tribunal parakataha.
2024 bilsini July aro August jao chatro chatrirangni jingjengatengmiting somoio, chatro chatrirangko so•otgalchina gita Sheikh Hasina-ni sorkari ge•etaniko on•aha aro iani chu•gimik sakkirangko uamang man•aha ine ukilrang, kacharina aganaha.
Hasina-ni pal kachario, a•songni songe on•gipa defence counsel aganchakaniko on•angengon, uni kosako iandake matnanganiranga kakket ong•ja ine uko jakgitel watchina mol•molahachim.
Indake ong•genchimoba, chatro chatrirangni jingjengatengmiting somoio Sheikh Hasina an•tangan, chatro chatrirangni kosako rakgipa ja•kurangko de•china ge•etdilgipa ong•a ine International Crimes Tribunal-ni Chief Prosecutor Mohammad Tajul Islam parakatskaaha.
Ia raiko on•na skang batanggimin adita salrangni gisepo, Bangladesh a•songo komibeoba rong 30 bomarangni gopretaniko nikna man•aha aro bol 26 garirangko so•chipe galaha.
Sheikh Hasina, re•anggipa 2024 bilsini August 4 tarikon Bangladesh a•songko wate kataha aro untalan India a•songo ma•chakengachim.
Muhammad Yunus-chi dilenggipa Bangladesh sorkari, Hasina-ko a•rikgalatchina gita India-koba didiatahachim indiba da•o dipet iani bidingo India a•song mamingkoba aganchakkujaenga.
Na·simang iakoba nina man·gen:
Na·simang iakoba poraina man·gen: Assam-o National Talent Hunt Program-ko Congress a•bachengata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
