Guwahati, Dec 30: Bangladesh-ni itihas-o mingsingbatgipa dilgiparangoni saksa, Khaleda Zia, ru•uta salrangna saani ja•mano Mongolbar pringo Dhaka-o janggi galaha.
Ua bilsi 80 ong•ahachim.
Uni siani koborko ru•uta bilsirangna uni dilanggipa Bangladesh Nationalist Party-ni (BNP) dilgiparang parakataha aro bilsini kri sabisi-bi•ati man•anirangna sanna-bananirangko dakengachim ine aganaha. Re•anggipa adita bilsirango ua uni be•en an•sengrorojani a•sel jinmarang baksa bakrimanirangko dakjaha.
Uan Bangladesh-ni skanggipa me•chik Prime Minister ong•achim.
Khaleda Zia changgittamna Bangladesh-ni prime minister ong•enba 1991-96ona, 96-o dikdiksa, aro pil•taie namen so•sojengjeng ong•miting somoirango 2001 oni 2006-ona dangdike on•angaha. Awami League-ni dilgipa Sheikh Hasina baksa uni meligrikgijanian bilsi 20-na baten a•songni politics-ni kam ka•anio mongsonggipa bak ong•e, sorokrango re•jomani aro sorkarini ja•kora ong•aniko bang•en nikangna man•aha.
Khaleda Zia-ni janggi tangani a•songo aro itihas-oba namen nangrimani gnang. Ua 1945 bilsio Bengal-o atchiaha, aro Bengal-ni ekgrikani ja•mano ua uni nokdang baksa East Pakistan-ona jitangaha. Ja•mano ua army officer Ziaur Rahman-ko bia ka•aha, jean Bangladesh-ni president ong•e, 1981 bilsio so•otaha.
Segipani siani ja•mano Khaleda Zia politics-o nape, BNP-ni mongsonggipa ong•aha aro bang•a constituency-rangoni bakrimaniko man•aha. Politics-o uni tang•doaniara ru•uta bilsirangna Bangladesh-ni military rule-ni ning•o ong•ani ja•mano democracy-ona sokbapilani baksa apsan somoio ong•eaha.
Uni kam ka•ani ja•mangipa bilsirango uni kosako niamni gita bang•a badi ka•anirang aro matnanganirangko man•aha, jekon BNP-ni dilgiparang uni kosako ong•gija dake miksonganichi ja•ku de•ani ong•a ine aganaha. Kacharini on•gimin ge•etanirang aro be•enni an•sengrorogijani a•sel ua politics-o namedake bak ra•na man•jaha indiba ua party-ni manderangna bilakgipa dilgipa saksa ong•angkuaha.
Bangladesh-ni dingtang dingtang politics-ni dolrangoni uko mande ra•e gisik ra•anirangko dake, bon•kamaona kingking dingtang dingtang chanchianirangchi ma•ekaniko man•genchimoba a•songni democracy-o uni kam ka•ani bidingo agananirangko dakangaha.
Na·simang iakoba nina man·gen:
Na·simang iakoba poraina man·gen: Assam-o Imam Mahmuder Kafila dolni sak 11 manderangko rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
