Shillong, Jan 22: India a•songo bakrobatsranggipa dolongrangoni damsa ‘Wahrew dolong’-ko da•al Sukrobar salni bako Meghalaya a•dokni Chief Minister Conrad K Sangma oprake on•angaha. Ia dolongara Bholaganj aro Sohbar-oni East Khasi Hills a•jao Nongjri-ko nangdimeatgipa dolong ong•achim.
Ia metre 169.35 ong•gipa dolongko India sorkarini Development of North Eastern Region (DoNER) Ministry-ni ning•o donggipa NLCPR-ni ning•o gong kror 4.395 tangkarangchi rikaha.
Ia dolongko oprake on•angani somoio a•dokni Chief Minister baksana Deputy Chief Minister Prestone Tynsong, Meghalaya Assembly-ni Speaker Metbah Lyngdoh, MLA Balajied Syiem, KHADC-ni CEM Titos Khain, MDC T Dkhar, jolni sordar-rang aro PWD-ni officer-rangba dongpae bak ra•angaha.
Ia project-o km 6.125 ong•e bakrogipa ramakoba man•chapahachim.
Ia dolongko ramako oprake on•angani somoio a•dokni Chief Minister jinmana aganprakengon, skangonin Meghalaya a•doko songdongenggipa manderang aro East Khasi Hills a•jani manderang, Wahrew chibimako kabate Bholaganj aro Sohbar-oni Nongjri-ona dolong tarianiko nangnikengtokengachim aro da•alo ia dolongko tarianichi manderangni jumangko chu•sokgipa ong•atna man•aha ine janapatenba, ia dolong ramara Bholaganj LCS baksa nangdimegipa rama ong•e da•o ia dolongko a•bachengatanichi Meghalaya a•doko aro mongsongbate a•dokni sima ari jolrango bading chiwalani kamrangko tang•doatna man•gnok ine parakataha.
Ia rama aro dolongara East Khasi Hills a•jani saliramoni, Bangladesh a•songni sima ari jolrango donggipa Pynurlsa aro Dawki-ko man•chape salaram jolo nangdimea ineba Chief Minister parakataha.
Ia dolongko Dr Donkupar Roy sagini oprake on•na skaniko gisik ra•atpilangengon, “Ia dolongara Dr Donkupar Roy sagina ge•sa mikkim donggipa project ong•achim aro ian uni jolo songdongenggipa manderangna on•kange kam ka•ani ong•achim,” ine Sangma parakataha.
Ia dolongko 2018 bilsini December jao matchotahachim.
Namroro silroroaniko ra•bana gitade rama jal•langrang namna gita nangchongmota ine janapatengon, rama jal•langrang namahaode pilak gipin kamrangba tang•dobana man•aiaha ine Chief Minister parakataha.
“Chingni kam ka•ani niamrango rama jal•langrangko tarianian mongsonggipa ong•a aro ian chingni kamrangko mesokani ong•a. Batanggimin bilsi gittamni gisepo rama tariani kamrangnan chinga tangka paisarangko bang•bate chamaha,” ine Chief Minister aganaha.
Ia tom•anio Meghalaya a•dokni Deputy Chief Minister Prestone Tynsong-ba jinmana aganprakengon, dingtang dingtang gital ramarangko tarina gita gong kror 145 tangkarangko chamanaha aro work order-rangko dambri constituency-rangna on•anggen ine parakangaha.
